Heta ke tecrîd bêro şikitene, xoverdayîşê ma do dewam bikero!

Çalakwananê grevê vêşanîye yê Strasbourgî, derheqê serbestveradayîşê Leyla Guvene de û xoverdayîşê grevê vêşanîye de qisey kerdî.

Hemserekê KCDK-E Yuksel Koç, parlamentera verên ya HDPyî Dîlek Ocalane û rojnamegere Gulîstan Çîya Îke zî tede 14 kesî grevê vêşanîye domnenê. Bi nameyê çalakwanan yew beyanat ame dayene. Beyanat de qerarê  domnayîşê xoverdayîşî  ame îlankerdene.

Bi sernuşteyê ‘Heta ke tecrîd bêro şikitene, xoverdayîşê ma do dewam bikero’ peyam ame weşanayene. Reyna derheqê serbestveradayîşê Leyla Guvene de zî wina ame vatene: “Guvene, seba ke tesîrê xoverdayîşî bêro şikitene, serbest ameya veradayene û no kay kayê şerî yê taybetî yo.”

Beyanat de wina ame vatene: “Grevê vêşanîye bi şîarê ‘Tecrîdî bişiknîme, Faşîzmî birijnîme, Kurdistanî bikîme Azad’ bi rayberîya Leyla Guvene dest pêkerd. Grevê Leyla Guvene kewt roja xo ya 79îne. Leyla Guvene roja 79î serbest ameye veradayene. Azadbîyayîşê Leyla Guvene ma kerdîme zerîweş. Hepisxaneyan de, Ewropa de, Hewlêr, Galler, Duîsburg, Hollanda û Toronto de grevê vêşanîye dewam kenê û nê çalakîyan mîyanneteweyî de têsîrêk viraşt û dîktatorîya Erdoganî zî ney tesîrî ver bêçare menda. Naye ser dest eşto bi kayê şerê taybetî. Ganî baş bêro zanayene ke, qet bi yew kayî nêeşkenê qerardarîya ma bişiknê û ma armancê ma ra bikerê dûrî.”

Grevê vêşanyîye seba ke tecrîd bêro şikitene ameyî dest pêkerdene

Beyanat de qiseyê Leyla Guvene yê badê serbestveradayîşî yê ‘ez do çalakîya xo bidomna. Çunke ez seba serbestveradayîşî nê, seba ke tecrîd bêro wedaritene kewta grevê vêşanîye’ ameyî nîşandayene.

Beyanatê çalakwananê Strasbourgî wina dewam kerd: “Leyla Guvene roja grevê vêşanîye ya ewile de va armancê mi şikitişê tecrîdê serê Rayber Ocalanî yo. Tecrîdo ke Rayber Ocalanî ser o yeno kerdene, pêroyê Kurdan û pêroyê şaran ser o yeno bicaardêne. Hêrişê tecrîd, qirkerdişî û îzolasyonîyan her cayê Kurdîstanî û Tirkîya girewto xo ver û welat kerdo  sey cehenem. Grevê vêşanîye, vera polîtîkayanê rejimê Erdoganî yê qirkerdiş û bêhiqûqî de rayîrêko muhîm akerd. Grevê vêşanîye yo ke bi rayberîya Leyla Guvene ameyo destpêkerdene pêl bi pêl bîyo vila û her hetê dinyaye de, pêro kesanê wayîrê wijdanî de tesîr kerdo.”

Ganî her kes wayîrê xoverdayîşî bivejîyo

Beyanat de bale ancîyaye weşîya Nasir Yagiz o ke roja grevê vêşanîye yê xo yê 66î de yo ser zî û wina ame vatene: “Sey Leyla Guvene, weşîya Nasir Yagizî zî xeter de ya û kewta roja 66î. Wextêko wina muhîm de, ma xoverdayoxê grevê vêşanîye yê “însîyatîfê Rayber Apoyî rê Azadîye“ vanîme, ma do xoverdayîşê Leyla Guvene hîna bikerê berz û bi qerardarîye mucadeleyê xo heta ke tecrîdê serê Rayber Ocalanî bêro şikitene dewam bikerê. Ma venga Kurdê ke Ewropa, Avusturalya, Kanada û her hetê dinyaye de ciwîyenê û pêroyê şar, bawerî, cinî, ciwan, roşinvîr, demokrat û muxalîfan danîme û vanîme bi hîsê berpirsîyarîye her kes wayîrê ney xoverdayîşî bivejîyo û goreyê ney tê bigêro.”

Însîyatîfê Rayber Apoyî rê Azadîye, Xoverdayoxê Çalakîya Grevê vêşanîye yê Strasbourgî.  STRASBOURG

Dikarî Biecibînî