Rêxistinê Zar: Padayîşê ofîsê NRTyî sîyasetê kiştişê azadîya fehmî yo

Rêxistinê Zar derheqê tepiştişê hemwelatîyan, çalakvananê komelo sivîl yê Dihokî, hemwelatîyê Şêladizê, xebatkarê televîzyona NRTyî û padayîşê ofîsê NRTyî yê Dihokî de îzehetêko nuştekî vila kerd û dîyar kerd ke padayîşê ofîsê NRTyî sîyasetê kiştişê azadîya fehmî yo û va: “Herêma Kurdistanî de her ke şona azadîya fikir û ramanî kêm bena.”

Çend rojî verê teyareyê şerî yê artêşa tirkî Şêladîzê, Dêralok, Zap û dormeyê ci bombardûman kerdbî û xeylê sivîlî ameybî qetilkerdiş. Şarê Şêladizê seba protestokerdişê hêrişê artêşa tirkî yê serê Behdînanî perê baregehê leşkerî yê Sirê yê artêşa tirkî fînabî dest û leşkerê tirkî şarî ser adir varna. Netîceyê hêrişan de 2 hemwelatîyî şehîd bibî 6 kesî zî birîndar bîbî. Hedîseyan ra dima Hukmatê PDKyî dest bi tepiştişê hemwelatîyan û sereştişê keyeyan kerd. Heta nika xeylê hemwelatî û rojnamegerî ameyî tepiştiş û ofîsê NRTyî yê Dihokî zî ame padayîş.

Derheqê babete de Rêxistinê Zar bi siloganê ‘Zextê îqtîdarî hemverê rojnamegeran de zêde bîyî’ îzehetêko nuştekî vila kerd û va: “Herêma Kurdistanî de her ke şona azadîya fikir û ramanî kêm bena. No zî sîyasetê antîdemokratîk yê îqtîdarê PDK û YNKyî vera qewimîyeno. No kenal raştî resneno şar.” DIHOK