Hepsîyê grevê vêşanîye: Ma adirê çeqê hepsîyan gur kenî

3 hepsîyê ke 44 rojî yo Zindanê Kandira de grevê vêşanîye de yî vatî: “Ewro roj roja wayîrvejîyayîşê Rayberî yo. Ma veng danê heme şarê kurd, azadîwaştox û keyeyan. Ewro zindanan de adirê çeqê cuya azade ameyo tanayîş. No adir gur û geş bikerên.”

3 hepsîyê Zindanê Tîpa Fyî yê Kandira seba wedarnayîşê tecrîdê serê Rayberê PKKyî Abdullah Ocalanî 17ê kanûne ra nata grevê vêşanîye yê bêdem û anêgêrayîşî de yî. Hepsîyê bi nameyê Sadettîn Yaşar, Turan Gunana û Mesut Atişî bi rayîrê keyeyanê xo mesaj erşawitî.

Mesajê hepsîyan wina yo: “Rayberê Şarê Kurd Birêz Abdullah Ocalan zerrîya kurd û merdimîye de yo. Rayberê ma îradeya şarê mezluman o. No 20 serrî yo ke Îmrali de vejîyayo çarmix. Êdî bes o? Do heta kamî wext no zilm û zilmkarî dewam bikero? Ma qebul nêkenî. Êdî ma vanê bes o. Rayberî veng o û vengê azadîwaşxotan o. Vengê cinîyê têkoşeran o. Vengê tarîx û komelo xozayî yo. Rayberî vengê merdimîye yo. Vengê merdimê ke muhtacê nanêk û tasek awe yo. Emparyalîst û dagirkerî wazenî Serektî bêveng bikerî. Wazenê ke Îmrali de bixeneqnê. Rayberî Ruhê Kurdistan û cuya seyyewbînanî yo. Ewro dora ma yo. Ewro roj roja wayîrvejîyayîşê Rayberî yo. Ma veng danê heme şarê kurd, azadîwaştox û keyeyan. Ewro zindanan de adirê çeqê cuya azade ameyo tanayîş. No adir gur û geş bikerên. Ewro roja wayîrvejîyayîşê Rayberî yo û wayîrvejîyayîş wezîfeyê ma yo.” KOCAELÎ