Demîr: Rewşa Guvene her ke şona xidar bena

Serekê Odeya Tebîban yê Amedî (DTO) Şerîf Demirî dîyar kerd ke Leyla Guvene bêhal a, madeyê aye ameyo girewtene, ge-ge nêeşkena awe zî bişima û zaf kîlo vîndî kerda.

Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) Leyla Guvene, seba tecrîdkerdişê serê Rayberê Şarê Kurdî Abdullah Ocalanî bêro wedaritene 83 rojî ya grevê vêşanîye yê bêdem û anêgêrayîşî de ya.

Rewşa weşîya Guvene her ke şona giran bena. Heyetê Odeya Tebîban ya Amedî (DTO) kontrolanê rûtîn ê weşîya Guvene kenê. Serekê DTOyî Mehmet Şerîf Demîrî da zanayene ke semedê ters û qesawetê şarî yê seba rewşa weşîya Leyla Guvene înan heyetêk amede kerdo. Demîrî qiseykerdişê xo de ard ziwan ke semedê waştişê avûkatan, seba tespîtkerdişê tesîrê ke grevê vêşanîye de weşîya Guvene de vejîyayê meydan û kontrolkerdişê rewşa aye, yew heyetê pisporî dest bi xebatî kerd. La seba ke Guvene bêhal a û xo baş hîs nêkena nêeşkeyê kontrolê weşîya aye bikerê.

Demîrî qiseykerdişê xo yê peyênan de wina va: “Guvene bêhal a, madeyê aye ameyo girewtene, ge-ge nêeşkena awe zî bişima û zaf kîlo vîndî kerda. Seba tedawîkerdişê Guvene no heyet rojanê verê ma de do defêna bişoro serdena Guvene.” AMED