Koçyîgît: Kam Dêrsim de nêçîrî keno û derheqê înan de çi ameyo kerdiş?

Hemverfeka HDKyî û parlementera HDPyî ya Muşî Gulîstan Kiliç Koçyigîte derheqê nêçîrê heywananê koyî de persnameyêk da meclîs û waşt ke Wezîrê Bajarvanî û Dorme Murat Kurumî cewab bido. Koçyîgîte dîyar kerde ke kam Dêrsim de nêçîr keno û derheqê nêçîrvanan de heta nika ti tehqîqat ameyo kerdiş ya nê?

Hemverfeka Kongreya Demokratîke ya Şaran (HDK) û Parlementera HDPyî ya Muşî Gulîstan Kiliç Koçyigîte derheqê nêçîrê heywananê koyî yê Dêrsimî de persnameyêk da meclîs û waşt ke Wezîrê Bajarvanî û Dorme Murat Kurumî cewab bido persanê aye. Koçyîgîte dîyar kerde ke Tirkîye de heywanê ke binê pawitişî de neslê înan çinbîyayîş ver de yî û va: “Taybet badê awankerdişê Santralê Hîdroelektrîkî (HES), bendê asayîş û Kanê Madenî ekosîstem xira bî. Neslê heywanê ke ganî bêrî pawitiş zî çinbîyayîş ver de yî. Herêma Dêrsimî de neslê heywanê sey Pezkovî, Heşa Boz, Kewê Sûs, Werşaq û sîqalk/keçelok çinbîyayîş ver de yî. Ganî nê heywanî bêrî pawitiş. La herinda pawitişî de nê heywanî bi hawayo kêfî hetê nêçîrvanan ra yenî nêçîrkerdiş. Munzur de pezkovîyê ke vila bîyî herême hetê şarî ra bimbarek yenî dîyîş. Şarê Dêrsim înan sey ‘Heywanê Xizirî’ bi name kenî. Cok ra şarê herême destê xo nêdano pezkovîyan. La Gelîyê Munzurî de hetê kesê ke nînê zanayîş ra yenî nêçîrkerdiş. No hem qetilkerdişê xoza û hem zî qetilkerdişê bawerî yo. Tena aşama çele de Dêrsim de 3 Werşaq ameyî kiştiş. 25ê çele de zî Werşaqêko merde rayîr ser de ame dîyîş. Serranê vîyarte de Konya û Erziromî de nê heywanî ameyêne nêçîrkerdiş.” DÊRSIM