Solhanî tedawî qebul nêkerd û reyna kewt grevê vêşanîye

Kerem Solhan grevê vêşanîye yê Strasbourgî de, hetê weşîye ra kewt tenge û naye ser seba ke teşhîs bêro kerdene ame berdene bi nêweşxane. La Solhanî tedawî qebul nêkerd û peyser ame Merkezê Komelê Demokratîk ê Kurdan û grevê xo yê vêşanîye domna.

Kerem Solhan roja grevê vêşanîye yê xo yê 44’ine de nêweş kewt. Seba Solhanî ambulanse ameye waştene. Solhanî tedawî qebul nêkerd û israrê doktoran ser tena seba ke nêweşîye  teşhîs bibo şî nêweşxane.

Nêweşxane de derheqê nêweşîya Solhanî de etudî ameyî kerdene û Dr. Fahrettîn Gulşenî no derheq de wina beyanat da: “Nêrehetîyê sey vilêşyayîşê masulkeyan, roqila pîle û made de zêdebîyayîşê gazî ameyê teşhîskerdene û velikan rêm girê dayo.“

Doktoranê nêweşxaneyî seba ke xetereyo giran esto israr kerd ke wa Kerem Solhan nêweşxane de bimano û tedawî bibo. Kerem Solhanî vateyê doktoran  goşdarî nêkerdî û bi ziwanêkê qetîyî tedawî red kerd.

Dr. Fahrettîn Gulşenî no derheq va dejê Solhanî ke 20 deqayan ra zêde dewam bikerê, ganî derhal ci rê mudaxele bêro kerdene. Eke nêbo rewşa ey do bikewo xetere. Goreyê vatena Dr. Fahrettîn Gulşenî, mabênê çalakwanan de rewşa tewr xirabe yê Kerem Solhanî ya. Grevê vêşanîye yê Strasbourgî kewt roja xo ya 45’ine û goreyê vatişê Dr. Fahrettîn Gulşenî, rewşa Yuksel Koç, Gulîstan Îke, Ayvaz Ece û Ekrem Yilmazî zî başe nîya. STRASBOURG