Ma do bibî vengê çalakgeranê grevê vêşanîye

Endamê Meclîsê Ciwanan yê HDPyî yê Edene ard ziwan ke ê piştî danî çalakîya grevê vêşanîye yê Leyla Guvene û heme çalakgeran û va: “Ganî seba aştî û asayî tecrîd wedarîyo.”

Çalakîya grevê vêşanîye ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdkerdişê Rayberê PKKyî Abdullah Ocalanî dabî dest pêkerdiş roja 85. de dewam kena. Endamê Meclîsê Ciwanan yê HDPyî yê Edene dîyar kerd ke ê wayîrê xoverdayîşê çalakgeranê grevê vêşanîye vejîyenî û va ‘Ganî ma veng bidî vengê înan.’

Derheqê babete de Endama meclîsî Mîhrîan Kiliçe qisey kerde û dîyar kerde ke çapemenî hemverê çalakîya Guven û hepsîyan de xo daya ker û lalîtî û wina dewam kerde: “Ma do xoverdayîş bikerî rojev ûwayîr bivejî. Ma do teber de bibî vengê heme xoverdekaran. Ganî seba aştî û asayî tecrîd wedarîyo. Ma seba tewrbîyayîşê çalakîyan veng danî heme ciwanan.”

Sewbîna Endamê Meclîsê Ciwanan Selman Şen zî wina va: “AKP aştîye nêwazeno û cok ra tecrîd heme dorme de ferz keno. Tecrîdkerdişê Ocalanî yeno mehneya tecrîdkerdişê şarê kurd. Bi pelçiqnayîş, hêrîş, binpaykerdiş û tepiştiş ciwan zî yenî tecrîdkerdiş. Ma seba şiknayîşê tecrîdî veng danî heme ciwanan ke wayîrê xoverdayîşî bivejî.” EDENE