Namzedê Yenîşehîrî: Ma do birînanê şarî pîya bipîşê

Namzedê hemşaredarîya Yenîşehîrî Belgîn Dîkene û Îbrahîm Çîçekî vatî ke ma do paştî bidê yewbînan û qayûman bierzê teber û birînanê şarê xo pîya bipîşê.

HDP, xeylî bajar û qezayan de namzedê xo yê hemşaredarîye kerdî eşkera. Belgîn Dîkene û Îbrahîm Çîçek zî bîyî namzedê hemşaredarîya Yenîşehîrî. Îbrahîm Çîçek 1981 de Amed de ameyo dinya û reyna perwerdeyê xo zî Amed de kerdo temam. Çîçek Zanîngeha Dîcle, beşa mamostayîye ra bîyo mezun û Elîh, Erxênî û Çinar de wezîfeyê mamostatîye kerda û xebatanê EGÎTÎM-SENî de ca girewto.

Îbrahîm Çîçek o ke ronayoxanê Akademîya Emekî ra yo serra 2016î de bi Qerarnameyê Hukmê Qanûnî (KHK) meslege ra ameyo îxrackerdene. Serra 2017î de serekîya DBPyî ya Amedî kerda. Çîçekî derheqê weçînitişê verê ma de wina va: “Tarîx de qet yew rêxistin û îqtîdarî, îdareyê herêmîyan rê sey ma xizmete nêkerda. Çunke derdê dewlete çîyêko bîn o. Xora merdim ke qayûman de ewnîyeno,na rastîye eşkera vîneno. Qayûman 3 serran de bi pêro hêzanê xo kerd ke Kurdistanî talan bikerê. Bi polîtîkayanê çinkerdişî îradeya şarî gasp kerde.”

Şarê Kurdistanî do cewabêko pêt bido qayûman

Çîçekî qiseykerdişê xo de va karê qayûmano verên o bî ke wa hafizaya komelkîye çin bikero û wina dewam kerd: “Pêro merkezê cinî û kultûrî padayî, nameyê Kurdî wedaritî. Ganî ma ney talankeran Kurdistan ra def bikîme. Ma do birînanê şar û bajarê xo pîya bipîşê û sazîyanê xo newe ra awan bikerê. Senî ke ma serra 1999 de şaredarîyî destê îşxalkeran ra girewtî, no weçînitiş de zî bi heman ruhî, şarê xo rê xizmete bikerê.”

Çîçekî bale ant tecrîdê serê Rayberê Şarê Kurdî Abdullah Ocalanî ser zî û qiseykerdişê xo wina domna: “Tecrîdê serê Ocalanî êdî sînorê îmralî ra vîyarto û pêroyê Rojakewteya Mîyonenê ra bîyo vila. Kurdî do 31ê Adare de cewabê xo yê pêtî bidê. Vera talan û înkarî, ma do şarê xo reyde mucadele bikerê.”

Bi nameyê xizmete qet nêkerd

Namzeda hemşaredarîya Yenîşehîrî Belgîn Dîkene zî serra 1969 de Amed de maya xo ra bîya û perwerdeyê xo zî Amed de kerdo temam. Dîkene, Komela Ekolojîk û Meclîsê Şarî de xebetîyaya û maya di domanan a. Mabênê serranê 2015 û 2017î de Hemserekîya HDPyî ya Yenîşehîrî kerda.

Dîkene zî derheqê weçînîyayîşê verê ma de wina qisey kerd: “Hukmatî waşt ke şarê ma bi vêşanîye terbîye bikero. Şarê ma îxrac kerd û bi hezaran kesî kar ra eştî. Tena kar ra eştene nê, bi nameyê xizmete qet çîyêk nêkerd. Îradeyê şarî eştî hepisxane û mor na bi berê sazîyan ra. Şarê ma do 31ê Adare de cewabê qayûman bido û înan bierşawo Anqara.”

Dîkene derheqê projeyanê xo de va ma do şarê xo reyde bixebetîyê û ma do qîymet bidê fikiranê cinîyan û rayberdiş de înan esas bigîrê. Hetê sosyal, kultûrî û ekonomîyî ra bi şarê xo qerar bigê û pîya îdare bikerê. AMED