Colemêrg do reyna rekor bişikno

Namzeda Hemşaredarîya Colemêrgî Seher Kadîroglû Ataş û Cîhan Karamanî bale antî weçînayîşê herêmî û vindetişê şarê Colemêrgî ser û vatî: “Colemêrg do 31ê Adare de reyna rekor bişikno. Şaredarîyan de vatiş yê şarî yo.”

Weçînayîşê herêmî yê 31ê Adare rê 59 rojî mend û pêroyê partîyan bêmaben xebetîyenî. Namzeda Hemşaredarîya Colemêrgî Seher Kadîroglû Ataş û Cîhan Karamanî dayî zanayene ke de şar do 31ê Adare de cewabêko gird bido. Ataşe Sendîkaya Kedkaranê Buro, verfekîya Platformê Cinîyan ya Ah Tamara û Hereketê Ekolojî yê Mezopotamya de zî xebetîya ya. Namzed Karamanî zî 15 serran şaredarî de xebetîyayo û 3 serranê peyênan de zî Serekîya Şûbeyê Colemêrgî yê DÎSKî kerdo.

Namzeda Hemşaredarîya Colemêrgî Seher Kadîroglû Ataşa ke 1986î de dewa Enver ya qezaya Geverî ya Colemêrgî de ameya diya û Unîversîteya Balikesîrî de Beşê Darayî wenda û 2017î de bi Qerarnam0eyê Hukmê Qanûnî (KHK) karê xo yê Mudirîya ÎŞKURî yê Wanî ra îxraç bîya qiseykerdişê xo de wina va: “Ma o tewrê cinîyanê Colemêrgî têbigêrî. Ma do hewl bidî ke bajar de potansîyelê hêzê cinîyan  vejî. Ma bi hêzê cinîyan şaredarî de kooperatîf awan bikerî. Çîyê herêmî zaf muhîm î. Goz û hengemînê Colemêrgî bi anme û veng î. Ma do bajar de bazarê keda cinîyan awan bikerî. Cayê ke hetê qayûmî ra ameyî padayîş do newe ra biabî.”

Ma do şaredarîyanê HDPyî teslîmê şar bikerî

Namzed Cîhan Karamanî zî wina va: “Şaredarîyê ke aîdê şar bî açarîyayî qereqolan. Labelê şar do 31ê Adare de cewabê înan bido. Ma pêroyê kêmasîyanê bajar tespît kerdî. Ma do tewrê şarê nê kêmasîyan çareser bikerî. Ma do fehmê şar wayîrê vatişî yo vila bikerî. Yanî ma do şaredarîyanê HDPyî teslîmê şar bikerî. Şar do qerarê xebatan bido.” COLEMÊRG