HDP: Cezaya ke dîyaya Tuncel û Kişanake dewamê derbeya 2ê Adare ya

Hemserekê Pêroyî yê HDPyî Pervîn Buldan û Sezaî Temellî reaksîyon nîşanê cezaya ke dîyaya Sebahat Tuncel û Gultan Kişanake  dayî û vatî: “Na ceza bi fermanê qesrî dîyaya. Cok ra qeraro ke ameyo dayene hetê ma de ti hukmê ci çin o.”

Hemserekê Pêroyî ya Partîya Demokratîke ya Şaran (HDP) Pervîn Buldan û Sezaî Temellî derheqê cezaya giran ke dîyaya Hemsereka Pêroyî ya Partîya Herêmê Demokratîkî (DBP) Sebahat Tuncel û Hemşaredara Bajarê Girdî ya Amedî Gulten Kişanake de îzehetêk dayî. Buldan û Temellî îzehet de dîyar kerdî ke muhakemekerdişê Tuncel û Kişanake de xeylê bêhuqûqî û bêusûslî estî û wina vatî: “Qerar huqûqî nîyo. Sîyasî yo û bi fermanê Qesrî dîyayo. Cok ra qeraro ke ameyo dayene hetê ma de ti hukmê ci çin o. Mehkema binê tesîrê îqtîdarî de şexsê Tuncel û Kişanake de sîyasetê demokratîke ceza kerda.”

Kesê ke cîya fikirîyenî xo rê kerd hedef

Hemserekê HDPyî Buldan û Temellî wina dewam kerdî: “No zîhnîyet dewamê înkarê kurdan ke 100 serrî yo dewam keno yo. No tena kurdan reyde sînordar nîyo. Heme hêzê demokratîkan, kesê fikirîyenî û heme muxalefetê domokratîkan tehdit keno. Senî ke hêrişê Cematî yê hemverê sîyasetê kurdan û şarê kurdan reyde sînordar nêmend û serê Tirkîye de bî derbe, AKP zî derbeya 20 Temmuze ya Rewşa OHALî de kesê ke cîya fikirîyenî xo rê kerd hedef.”

Muhendîsîyêko sîyasî xo mîyan de nimneno

Hemserekî tewr peynî qala Selahattîn Demîrtaşî û weçînayîşê herêmî zî kerdî û wina peynî kerdî: “No qeraro ke weçînayîş ra ver ameyo dayîş, muhendîsîyêko sîyasî xo mîyan de nimneno. No îqtîdar her ke ceza bido, ‘numineya Selahattîn Demîrtaşî ke seba Xelata Nobelî ya Aştîye ame nîşandayîş’ ma do gird bibî. Kesê ke no qerar dayî û zindanê Amedî de îşkence bi Kişanake kerdî, do sey rî sîyayê tarîxî bêrî virardiş. Cezaya ke dîyaya Tuncel û Kişanake dewamê derbeya 2ê Adare ya.”ANQARA