Ma do seba hepsîyan vengê xo berz bikerî

Nîzamettîn Yenero ke lajê ci Zindanê Tîpa Lyî yê Dîlokî de grevê vêşanîye yê bêdem û anêgêrayîşî de yo veng da kurdan ke piştî bidî çalakîya hepsîyan û va: “Eke ma ra veng nêvejo do zilm û zordarî bizêdîyo.”

Çalakîya grevê vêşanîye ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba peynîkerdişê tecrîdo girankerde ke serê Rayberê PKKyî Abdullah Ocalanî de yeno meşnayene dabî dest pêkerdiş roja 88. de dewam kena. Badê çalakîya Guvene grev bi eynî waştişan vilayê heme zindanan bî û 50 rojî yo ke hepsî grevê vêşanîye yê bêdem û anêgêrayîşî de yî. Hepsîyê ke dest bi grevê bêşanîye yê bêdem û anêgêrayîşî kerdî ra yew zî Şaban Yenero ke 28ê Çele de Zindanê Tîpa Lyî yê Dîlokî de dest bi grev kerdbî yo.

Pîyê Şababî, Nîzamettîn Yenerî (53) dîyar kerd ke bi telefon lajê xo reyde qisey kerdo û lajê ci wina vato: “Ma seba peynîkerdişê tecrîdêkerdişê Serekî kewtî grevê vêşanîye yê bêdem û anêgêrayîşî. Şexsê Ocalanî de heme şarê kurd yeno tecrîdkerdiş. Helbet Abdullah Ocalan serek o. Çareserkerdişê problemê kurd tena bi Ocalan pê yeno. Wa heme kes baş bizano ke, wexto ke tecrîdkerdişê Ocalanî peynî bibo do tecrîdkerdişê şarê kurd zî peynî bibo. Wa zilm û heqaret peynî bibo. Kes no zilm qebul nêkeno.”

Ganî ma pîya vengê xo berz bikerî

Yenerî dewamê qiseykerdişê xo de wina va: “Seba çareserkerdişê problemê kurdan ganî Ocalanî reyde pêvînayîş bêro kerdiş. Tena Ocalan eşkeno problem çareser bikero. Ganî hukmat gaman bierzo. Eke nêerzo do grevê vêşanîye hîna vila bibo û heme çîyê ke biqewimî ra hukmat berpirsîyar o. Eke şehadet bibî berpirsîyar hukmat o. Çimkî hukmat gaman nêerzeno. Eke ma ra veng nêvejo do zilm û zordarî bizêdîyo. Ganî ma pîya vengê xo berz bikerî.” AMED