Rûsya de qursê Ziwanê Kurdî dest pêkerd

Bajarê Krasnodarî yê federasyonê Rûsyayî de seba domanan qursê ziwanê Kurdî dest pêkerd. Keyeyan eleqeyêko gird mojna qursê ziwanê Kurdî yo ke bi rayberîya Otonomîya Kulturê Kurdî ya Krasnodarî dest pêkerdo.

Bi Otonomîya Kulturê Kurdî ya Krasnodarî û bi paştîdayîşê tayê aktîvîstan qursê ziwanê Kurdî bi a. Doman û ciwanan reyde Kurdê ke herême de ciwîyenê eleqeyêko gird mojna qursê ziwanî.

Gama verêne de goreyê kategorîyanê serran sey hîrê sinifan, tewr kêm hewteyî de di rojî do qurs bêro dayene. Mamostatîya qursî Îşxan Ankosî û Nûrê Eşîrî girewte xo ser. Îşxan Ankosî yo ke serrê xo zaf ê, ard ziwan, seba ke domanê Kurdan asîmîle nêbê û bi ziwanê xo bieşkê xizmet şarê xo rê bikerê no kar kerdo ra xo ver û vat, “Rûsya de verê cû eleqeyê şarî zêdetir bi. Verê 20 serran wextê ke şarê ma newe koçê Rûsyayî kerd qisaweta ma ya bingeyêne bîye. ”

Ankosî muhîmîya ziwanî ser o vat, “Cimat bi ziwanê xo estbîyayîşê xo domneno. Berey bo zî ma wazenîme dest bi xebatî bikerîme û nê xebatî baş bîyarîme ca. Ma hêvî kenîme ke na babete de şarê ma zî ma reyde hetkarîye keno û nê rayîrî de leyê ma de beno.”

Heme mesrefî ameyî dayene

Tilmane Kaçax û birayê ey Bekirê Kaçaxî heme mesrefê qursê Kurdî girewto xo ser, dayo û ke naye ra ver zî nê keyeyî paşte dayebî xebatanê seba ziwan û edebîyatê Kurdî. Tilmane Kaçaxî derheqê muhîmîya qursî de vat, “Zaf zereyê ma dejeno ke verê çimanê ma de, şexsê domananê ma de kulturê ma mîyan ra darîno we. Kulturê Kurdî zaf kehen (qedîm) o û ziwanê Kurdî dewlemend o. Ma bi deyîranê dengbêjan bîme pîlî, ma govendî bi nê ziwanî girewtî. Ma bi nê ziwanî şîîra xo ya tewr verêne wende û goştarîya deyîranê weşan kerde.”

Paştdayîşê şarê ma muhîm o

Nûrê Aşîrî yo ke mamostatîya qursî keno zî vat, “Eleqeyê şarê ma gird o. Aver de seba ke ma xebatanê girdan û muhîman bikerê paştîdayîşê şarê ma muhîm o. Bê paştîdayîşê şarî nê karan de serkewtebîyayîş zor o.” KRASNODAR