Hemverê polîtîkayanê qayûmî de do yewî ser bikewo

Namzeda Hemşaredarî ya Yewîya Hêzê Şorişgeran ya Dêrsimî Nurşat Yeşîle dîyar kerde ke cinî do qezencanê xo tepîya bigêrî û şaredarîya cinîyan do dewam bikera. Namzedê Hemşaredarî Hidir Demîrî zî bale ant muhîmîya yewîya hêzan ser û va: “Ma do hemverê qayûman de 31ê Adare tacedare bikerî.”

Heme partîyê sîyasî lez dayî xebatanê weçînayîşê herêmî ke do 31ê Adare de pê bêro. Namzedê şaredarîyan yenî aşkerakerdiş û tewrê xebatan benî. Namzedê Hemşaredarî yê Yewîya Hêzê Şorişgeran yê Dêrsimî Nurşat Yeşîl û Hidir Demîrî derheqê xebataê weçînayîşî de qisey kerdî.

Nurşat Yeşîle hemşîre ya û bi serran Xarpêt û Dêrsimî de xebetîyaya. Seba ke Endama Sendîkaya Kedkaranê Xizmetê Sosyal û Weşîye (SES) bîye xeylê reyna ameya surgunkerdiş. Bi Qerarnameyê Hukmê Qanûnî (KHK) zî ameya îxraçkerdiş. Niha zî bî 5 serrî ya ke Şûbeyê SESî yê Dêrsimî de Serektî kena.

HDP reyna sîyasetê xo yê cinîyan nîşan da

Yeşîle qiseykerdişê xo de bale ante xebatanê qayûmî ser û wina va: “Heme projeyê ke kerdo dewre yê şaredarîya DBPyî yî. Qayûm tene bajar de hûmara çilayan zêde kerdo û polîtîkayê asîmîlasyonî aver berdo. Polîtîkayê ke ti eleqeya ci bi kultur, bawerî û ziwanî reyde çin o, kerdo dewre. Ma tewrê cinîyan xebetîyenî û ber bi ber gêrenî. Ma do qayûmo ke tayînê îradeya cinîyan ameyo kerdiş birijnî. Ma do komeleyê ke hetê qayûmî ra ameyî xespkerdiş tepîya bigêrî û reyna bikerî xizmetê şar. Partîyê sîyasî yê sewbîna 81 bajaran ra tena 5ê ci de cinîyan namzed nîşan dayî. HDP reyna sîyasetê xo yê cinîyan nîşan da. Cinî bi serran têkoşînê sîyasetî da û ewro adres HDPyo.”

Ma hemverê qayûmî de pîya têgêrenî

Namzed Hidir Demîrî (60) qezaya Pêrtagî ya Dêrsimî de wexto ke lîse wendêne bi fikrê çep û çepgiran şinasîya. Aye wext ra nata heme raşteyan de têkoşîn dayo. Demîrî têkoşînê xo tewr zêde raşteyê ked û demokrasî de dayo û tewr peynî Rayîrberîya Merkezê Pêroyî yê Tarim Orkam Senî de xebetîya û ame îxraçkerdiş.

Demîrî rayîrberîya Partîya Kede (EMEP) ya Dêrsimî de kerd û va: “Awankerdişê hêzê yewî bi talebê şarê Dêrsimî virazîya. Vîşêrê Federasyonê Meclîsê Sosyalîstî heme hêzî pîya têgêrenî û heta roja peynî zî heme hêzan rê berê ma akerde yo. Ti sebebêk raşte de çin o ke sewbîna hêzî tewrê ma nêbî. Tena waştişê ma oyo ke pêroyî hemverê polîtîkayanê îqtîdarî de reaksîyon nîşan bidî. Ma hemverê qayûmî de pîya têgêrenî. Ma veng danî CHP û SMFyî zî tewrê yewîya hêzî bibî. Ma lez dayo xebatanê xo. Ma pîya xebatan meşnenî. Ma do ser bikewî. Ma do xo û bajarê xo rayîr bibî. Ma do qayûmo ke tayînê îradeya şar bîyo biqewirnî. Ma do 31ê Adare tacedar bikerî.” DÊRSIM

Dikarî Biecibînî