58 serrî yo ke Sur de şewqa derzeno

Remzî Kagar hîna ke 10 serrî bîyo dest bi karê deştişê şewqayan kerdo û ewro Amed de tena bi serê xo ney karî keno. Kagarî meslega xo de 58 serrî derbaz kerdê û hîna zî makînayê deştişî ser ronişeno û şewqayan derzeno.

Remzî Kagar 58 serrî yo ke Sur de şewqa derzeno. Kagar nika 68 serrî yo. Amed de wextêk şewqa moda bî. O wext xeylî terzîxaneyan de şewqayî ameyêne deştene û xeylî hostayê ney karî bîyî. La wext vurîya û hemmesleganê ey dikanê xo padayî û na meslege de tena mend.

Kagar, atolyeya xo ya qij û tenge de, bi yew  makînayê deştişî yê kanî sîparîşanê taybetan derzeno. Kagarî serra 1959 de sey şagirt dest kerdo bi na meslege û a roje ra nat ney karî keno. Kagar vano mabênê serranê 1960 û 1970 de, her kesî mecburî şewqa nayêne xo sere. Naye ra zî xeylî kesan na meslege kerdêne. Qaso ke Kagar vano, serra 1970 de 10 ra zêde atolyeyan no kar kerdo û her atolya de 7-8 kesî xebetîyayê. Reyna qaso ke vano, Amed de di hostayî tena ney karî kenê û ê zî bi zor û zehmet payan ser o vindenê.

Kagarî wina qisey kerd: “Şewqayê sportîfî hîna zêde yenê rotene. Ez hem şewqayanê sportîfan, hem 8 koşeyan derzena û teka xo 20 lîra ra roşena. Zaf kes nêherîneno. Ma sey verî kar nêkenîme. Merdîn û Riha de kesê ke ney karî bikerê nêmendî. Verî Amed, Riha, Sêrt, Erzirom, Mêrdîn, Xarpêt, Meletî û Mereş de her kesî şewqayê 8 koşeyinî nayêne xo sere. Ewro tena kesê ke 50 serrî ra vîyarte yê herînenê. Na meslege de çîyo tewr muhîm qalib o û qalib viraştene zî karê her kesî nîyo. Çiqas mi dest ra bêro ez do meslega xo dewam bika.” AMED

Dikarî Biecibînî