Mîrê Bilûrê ame rayîrkerdene

Hunermendo Kurd Egîdê Cimo yo ke sey Mîrê Bilûre yeno zanayene Ermenîstan de ame definkerdene.

Mîrê Bilûre Egîdê Cimoyî şewa 30’ê Çele, paytextê Ermenîstanî Erîvan de wefat kerdibi. Cenazeya Egîdê Cimoyî, goristanê Kamişli yê Oktoberyani de ameye defînkerdene.

Yewîya Kurdistanî ya Ermenîstanî û Komîteya Kurdistanî ra xeylî kesî, Vakurê Kurdistanî ra bi nameyê hunermendanê MKMyî  Çîya Şenses, bi nameyê hunermendanê sînema Veysî Altay, Ma Muzîkî ra Mamosta Şêrko û îdarekarê KOM Mûzîkî Yemlîhan Adiguzel û Ewropa û Başur ra xeylî hunermendî beşdarê  merasîmê cenazeye bîyî û raywanîya  ey a peyêne de Egîdê Cimo tena nêverda.

Bi serran kultûrê kurdan rê ked kerd

Ronayoxanê Meclîsê Şengalî ra Silo Dîrboyanî bi nameyê Yewîya Kurdan a Ermenîstanî û  Komîteya Kurdistanî qiseykerdişêk kerd û wina va.“ Ma Kurdî seserra 20an de çîn ameyî hesibnayene û ameyîme qetilkerdene. Ziwan û kulturê ma ameyî qedexekerdene. Apo Egîd eslê xo de Êzîdî yo û keyeyê ci  mecburîyetî ver bar kerdo û ameyo Ermenîstan. Radyoyê Ermenîstanî de bi serran xebetîyayo û kulturê Kurdan rê xizmete kerda. Bi huner û welatperwerîya xo sey nimûne ameyêne nîşandayene. Wa sereyê keyeyê ey, sereyê pêro Êzîdîyan û sereyê şarê Kurdî weş bo. Ma soz danîme ey ke ma do hunerê ey rê wayîr bivejîyê  û nameyê ey her tim bîyarê xo vîr.”

Hunermendê  Ma Mûzîkî Mamosta Şêrkoyî zî wina qisey kerd; “ Yew neslê Kurdistanî bi bilûra to bî pîl. Ma soz danîme to Apo Egîd, ma do bi vengê bilûra to hîna zêde ciwanan bikerê pîl û vengê bilûra to qet kêmî nêkerê. Ti do dil û zerrîya xort û azebanê Kurdîstanî de tim biciwîye. Oxir bo to rê Apo. Oxir bo.”

 Bi hunerê xo welatê xo de bi

Bi nameyê Merkezê Kulturî yê Mezopotamya Çîya Şensesî  zî qisey kerd. Şensesî seba Egîdê Cimoyî  va Ap Egîdê Cimo bêmerg o û wina dewam kerd:“ Mamosta Egîd welatê xo ra dûrî bi, la bi hunerê xo tim bi eşq welatê xo de bi. Bi huner û şexsîyetê xo, sey merdimêko bêemsal ameyene nîşan dayene. Mamosta Egîdê Cimo bêmerg o, çunke bi vengê bilûra xo, bi huner û bi eşqê Kurdîstanî, wayîrê cayêko muhîmî yo.” ERÎVAN