Siwêreg êdî qralîyet û dîktatorî ra aciz bîyo

Namzedê HDPyî yê Siwêregî Tûran Tuysuz û Emîne Çetînere dîyar kerdî ke êdî şarê qeza qralîyet û dîktatorî ra aciz bîyo û wina vatî: “Ma goreyê raybazanê partî têgêrenî û seba ke ma bibî cewabê waştişê şarê qeza bîyî namzed.”

Bi serran o qezaya Siwêregî ya Riha de bi piştîya dewlete xizmetê tay keyeyan de ya. Labelê şarê qeza bi qerradar o ke 31ê Adare de seba bedilnayîşan şêro sindoqan ser. Namzedê Partîya Demokratîke ya Şaran (HDP) yê Siwêregî Tûran Tuysuz û Emîne Çetînere dayî zanayene ke ê do 1ê Nîsane de rayîrberîya şaredarî dewrê şarê qeza bikerî.

Tûran Tuysuzî qiseykerdişê xo de wina va: “Siwêreg 32 bajaranê Tirkîye ra hîna pîl o. Labelê nika bedilîyayo sey dewêko pîl. Bi serran o sîyasetmedarî xizmetê tîya nêkenî. Nê sîyasetmedaran vera qeza dîya sey dew. Partîyê ke heta nika kar ser de bî seba Siwêregî ti çîyêk nêkerdî. Ma do tewrê hemşaredara xo ya cinî, goreyê polîtîkayanê partî têbigêrî û ma do nîşan bidî ke HDP çi keno. Sewbîna heme partîyî bi îmkananê dewlete têgêrayî û sey lutfêk pêşkeşê şar kerdî. Ma do siwêregijan na rewşe ra rizgar bikerî. Xizmetê ke bi îmkanê dewlete pêşkeşê şar yenî kerdiş, esasê xo de yê şar î. Ganî ma nîşan bidî ke nê çîyî bi bace şar yenî kerdiş. Hetkarîya extîyar û domanan sey lutfêk yena pêşwazîkerdiş. erzê zîretê yê Siwêregî zaf î, labelê citkar û heywankarî perîşan î. Ez veng dana şarî ke dormeyê HDPyî de arê bibî.”

Şar êdî qralîyet û dîktatorî ra aciz bîyo

Emîne Çetînera ke zext û zoriya Eşîrera Bûcakan vera mecbûr menda ke dewa xo ra vejîya, badê xeylê serrran HDPyî de bîye namzed. Çetînere qiseykerdişê xo de wina va: “Do şarê qeza HDPyî reyde nefes bigîro. Waştişê şarê ma zaf o. Seba ke ma bibî cewabê waştişê şarî, nika ra ma dest bi xebatan kerde. Ma şonê zîyaretê esnafan û keyeyan. Şar êdî qralîyet û dîktatorî ra aciz bîyo. Şar zilmê AKPyî ra xeng bîyo. Ma goreyê raybazanê partî têgêrenî û seba ke ma bibî cewabê waştişê şarê qeza bîyî namzed. Do reya yewin Şaredarîya Siwêreg biba şeffaf. Projeyê ma yê cinîyan esto. Sîstemê hemşaredarî do zîhnîyetê hemverê cinîyan bişikno. Sebebê binpaykerdişê AKPyî yê serê cinîyan ters o.  No ters do timî serê înan de bibo. Çimkî cinî do heme cayê komelî de bibî.” RIHA