Dayîka hepsîyê grevê vêşanîye: Hepsî bi qerardar î

Fehîme Ekmeza ke dayîka Nîhat Ekmezo ke seba wedarnayîşê tecrîdê sere Rayberê PKKyî Abdullah Ocalanî kewt bî grevê vêşanîye va: “ Ma do heta peynî piştî bidî waştişanê domananê xo.”

Çalakîya grevê vêşanîye ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba tecrîdkerdişê Rayberê PKKyî Abdullah Ocalanî peynî bibo dest pêkerdbî kewt roja 91. Badê Leyla Guvene çalakî vila bî heme zindanan û hepsîyê sîyasî zî seba eynî waştişan dest bi grevê vêşanîye kerdî. Nê hepsîyan ra yew zî Nîhat Ekmezo ke 1996î ra nata zindan de yo yo. Nîhatî Zindanê Tîpa Tyî yê Şakranê Îzmîrî de tewqîfkerde yo.

Dayîka Nîhatî, Fehîme Ekmeze qala rewşa hepsîyan kerde û dîyar kerde ke pêvînayîşê lajê xo reyde ameyo vatiş ke hepsî do heta peynî çalakîya xo dewam bikerî.

Heta ke peynîya tecrîdî nêro do grevê ma dewam bikero

Fehîme Ekmeze qiseykerdişê xo de va: “Rewşa hepsîyan baş nêbîye. Labelê reyna zî timî huyayêne. Vatêne ‘Heta Rayberîyê ma azad nêbo, ma do çalakîya xo dewam bikerî. Rayberê ma yeno tecrîdkerdiş. 4-5 serrî yo kesêk nêeşkeno pêvînayîş virazo. Heta ke peynîya tecrîdî nêro do grevê ma dewam bikero.’ Badê pêvînayîşî ez û lajê xo ma telefon de qisey kerdî. Lajê mi zî eynî waştişan dibare kerde û dîyar kerde ke do heta peynî çalakîya xo dewam bikerî.”

Wa gaman bierzî

Ekmeze tewr peynî nê çîyan arde ziwan ser: “Ma do heta peynî piştî bidî watişanê domananê xo. Waştişê ma oyo ke ganî waştişê domananê ma bêrî bicaardiş û qebulkerdiş. Ma zî sey domananê xo peynîkerdişê tecrîdê serê Rayberî û pêvînayîşan wazenî. Ez veng dana îdarekaranê dewlete ke waştişê domananê ma bêrî qebulkerdiş û bicaardiş. Wa gaman bierzî.” STENBOL

Dikarî Biecibînî