Zindanê Şakranî de vîtamînê B1 nîno dayene

Endama Meclîsê Partîya HDPyî Gulay Gun Bîlîcîya ke Zindanê Cinîyan yê Şakranî ra vejîya dîyar kerde ke rewşa weşîya 3 cinîyanê ke grevê vêşanîye de yî giran a û vîtamînê B1 nîno dayene.

Çalakîya grevê vêşanîye ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdkerdişê Rayberê PKKyî Abdullah Ocalanî dest bi gervê vêşanîye kerdbî roja 91. de dewam kena. Badê çalakîya Guvene zindanan de zî xoverdayîş dest pêkerd û nika 391 hepsîyî 53 rojî yo ke grevê vêşanîye de yî. Zindanê Cinîyan yê Şakranî de zî 26ê Kanûna 2018î de Rahşan Aydin, Ebrû Guden û Gulten Akgune kewtî grevê vêşanîye yê bêdem û anêgêrayîşî.

Endama Meclîsê Partîya HDPyî Gulay Gun Bîlîcîya ke Zindanê Cinîyan yê Şakranî ra vejîya daye zanayene problemê weşî yê cinîyanê ke grevê vêşanîye de yî zêde yî û rayîrberîyê zindan înan baş kontrol nêkeno.

Bîlîcîye qiseykerdişê xo de wina va: “Do rojanê aver de hûmara kesê ke grevê vêşanîye de yî zêde biba. Kontrolê çalakgeran nîno kerdene. Doktorê zindan tena ewnîyeno tansîyon û nabizê hepsîyan. Ganî 2-3 rojan de kontrolê gonîye biameyêne kerdene, la nîno kerdene. Badê 20 rojan karbonat dayî. Xora vîtamînê B1 nêdanî. Rewşa weşîya 3 cinîyanê ke grevê vêşanîye de yî giran a û vîtamînê B1 nîno dayene.”  ÎZMÎR