Hemwelatîyo ke dest nîyayo keyeyê ey ser paştîdayîş paweno

Keyeyê Erol Kabîrî yê Sûrî, bi ‘îstîmlaqkerdişê lezkanî’kenê ke dest ra bigîrê. Seba ke keyeyî destê ey ra bigîro TOKÎyî ci rê dawa akerda û meşte mahkeme do dest pê bikero. Kebîr seba ke hetê ekonomî ra nêeşkeno avûkat pê bigîro paştdarîye wazeno.

Taxa Alîpaşa ya girêdayîye qezaya  Sûrî ya Amedî  de, bi nameyê ‘bedilnayîşo Şaristankî‘ rijnayîşê keyeyan û awaniyan dewam keno. Taxe de cayê ban û awahîyanê verênan de vîllayê 2 qatinî yenê viraştene. Keyeyê Erol Kebîrî zî nê keyeyan ra yew o. Kebîr no keye de maya xo ra bîyo û 55 serrî yo ke nê keyeyî de nîşeno ro.

Mudurê Bajarî yê Polîtîkayanê Keye û Sosyalî Halî Acar serra parî şi Erol Kebîr zîyaret kerd û sozê hetkarîya madî, keye û karî dabi  Kebîrî. Nê zîyaretî sey xebere Ajansê Anadolu de ca girewtbî û xebere de wina amebî vatene: “Dewlete Dîyarbekir de yew hemwelatîyo ke 30 serrî yo ke tena maneno rê wayîr vejîye.“ Reyna na xebere pêroyê çapemenîye ya hetkare de ca girewtbî. Verî kesanê ke va ma do hetkarîya to bikerê, qet wayîrê mi nêvejîyayî. Tewr vatê ti ke biwazê bizewecîye, ma do hetkarîya to bikerê. Mudurê Polîtîkayanê Keye û Sosyalî yê Amedî Halît Acarî nê sozî dayibi mi la nêardi ca. Wexto ke ame zîyaretê mi ez zaf bibîya keyfweş. 500 lîra zî dayibi mi, mi zî va qey ê do hetkarîya mi bikerê. Tinêvana seba ke ez keyeyê xo ra bivejîya û şora kîra o pere dayo mi. Ez pêyê cu heşarê ci bîya. Roje ez şîya zîyaretê ey û o wext mi ra va. ‘Ti hîna keyeyê xo ra nêvejîya?’ Ez çira keyeyê xo ra bivejîya ke? Keyeyê min o, tapuya mi esta.”

Kebîrî qiseykerdişê xo wina domna: “ Ez no keye de maya xo ra bîya û 55 serrî yo ke no keye de manena. La qaso ke rapore da ca girewto vanê keye 25 serrî yo.No keye ê mi tena nîyo, 3 hîsedarî estê û layîqê 46 hezar bahayî dîyo. TOKÎ seba ke keyeyê mi mi dest ra bigîro derheqê mi de dawa akerda û mehkeme do 7ê Sibate de bêro dîyayene. La avukatê mi çin o. Ez nêeşkena xo û heqa xo bipawa. Wa yew  paştdarîye bido mi û mi ra wayîr bivejîyo.”

Kebîr nêweşîye ver nêeşkeno bixebetîyo û reyna zî her çiqas ke muracatê ÎŞ-KURî kerdo,qet ci rê kar nêameyo dîyayene. Eke keyeyê xo ke bikero vîndî, o do teber de bimano. AMED