Çalakîya Leyla Guvene roja 92. de ya: Xeylê hunermendî piştî dayî

Merkezê Xeberan

Hemsereka KCDyî Leyla Guvena ke seba wedarnayîşê tecrîdkerdişê Rayberê PKKyî Abdullah Ocalanî çalakîya grevê vêşanîye daye dest pêkerdene roja 92 de çalakîya xo dewam kena. Xeylê hunermendî piştî dayî Guvene û deyra bi nameyê ‘Leyla’ vatî.

Çalakîya grevê vêşanîye ke hemverê tecrîdkerdişê Rayberê PKKyî Abdullah Ocalanî de bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke dest pêkerdbî, roja 92. de dewam kena. Guvene seba wedarnayîşê tecrîdo girankerde ke serê Rayberê PKKyî Abdullah Ocalanî de yeno meşnayene, 8ê Teşrîna Peyêne de Zindanê Amedî de dest bi grevê vêşanîye kerdbî û dima ra çalakîya aye vilayê zindanan, Tirkîye, Hewlêr, Fransa, Mexmûr, Şengalî û xeylê cayan bîye. Guvene badê ke 25ê Çele de serbest ameybî veradayîş keyeyê xo de çalakîya xo dewam kena.

Rewşa Leylaye giran bena

Rewşa weşîya Guvene çend şina xirabêr bena. Ame vatene ke, tansîyonê Guvene zaf kewto, bêhal bîya,  problemê sey hewnî,  zor şimitişê  awe, krampê madeyî estî û hemverê boye û roşinî de zêde hesasbîyayîş virazîyayê. Guvenê bê hetkarî rayîr ra şina. Sewbîna çalakîya Guvene her roje hetê parlementer û rayîrberanê HDP, DBP, TJAye ra yena silamkerdiş. Roja dest pêkerdişê çalakîya Guvene ra nata piştîdayîşê hunermend, nuştox, sîyasetmedar û hemwelatîyan tayî nêbîyo.

Çalakîya Endamê Meclîsê HDPyî Nasir Yagizî ke Hewler bi eynî taleban dest pêkerdbî zî roja 79. de, çalakîya grevê vêşanîye ya Strasbaurgî û ya Îmam Şîş yê Gallerî roja 53. de, çalakîya koma ewil ke 16ê Kanûne de zindanan de dest pêkerdbî roja 54. de, çalakîya endama Meclîsê Îştar ya Mexmûrî Fadîle Toke roja 19. de û çalakîya Hemsereka DBPyî Sebahat Tuncel û parlamentera HDPyî ya Colemêrgî ya verê Selma Irmake zî roja 24. dewam kena. Nika pêropîya zindanan de 281 ra zêde hepsîyê sîyasî grevê vêşanîye yê bêdem û anêgêrayîşî de yî.

Seba Guvene xeylê hunermendî ameyî tê het

Xeylê hunermendî seba piştîdayîşê Leyla Guvene ameyî tê het û deyra bi nameyê ‘Leyl’ vatî. Leyla Guvene hunermendê ke ameyî tê het rê sipasîyan kerde û serê hesabê xo yê medyaya komelkî de wina va: “Ez seba her kesê ke na deyre mi rê dîyarî kerdî rê sipasîyan kena. Bi umidê ke ma rojanê aştîyane de bi govend û dîlanan bêrî tê het rê vana ke başo şima estî.”

Hunermendê ke deyre vatî:Deniz Deman, Nilgun Başozdeş, Elenore Fourniau, Leman Stehn, Baran Bozyel, Nuray Balik, Ruken Yilmaz, Binewş Roj, Berivan Barcadurmuş, Gulistan Mousa, Perwin Ali, Sevdar Mousa, Xelil Xemgin, Ozan Seyidxan, Ozan Comert, Ozan Emekçî, Ozan Serdar, Ferhat Tunç, Ozan Dilovan, Hesen Şerîf, Necmeddin Xulamî, Rotînda Yetkiner, Baran Tezkorkmaz, Cuma Soner û Diyar Dersimî yî.

Lînkê Klîbî wina yo:

Dikarî Biecibînî