Avûkatê doza Cizîrî: Ma zanenê hukmat serê konseyî ra zor dayo mehkema

MHME seba muracatanê derheqê Cizîrî de qerarê ‘nîno qebulkerden’ da. Avûkatanê doze ra Ramazan Demîr û Newroz Uysale vatî: “Ma zanenê ke huqûqnasê AYMyî timî şonî MHMEyî. Ma zanenê ke hukmat serê konseyî ra zor dayo mehkema. Yanî ma wina fikirîyenî ke MHMEyî rê vatî ‘şima nê dosyayan ma rê vera bidî.’”

Mehkemeya Heqanê Merdiman ya Ewropa (MHME) qerarê xo yê ‘şikkerdeyî’ ra dima, doza Cizirî de zî mohrê xo da binê qerarêde sosretî ro.  Muracatê vera hovîtîya dewleta Tirkîye ya qezaya Cizîrî ya Şirnexî ke mabênê serranê 2015-2016î de bi seyan merdimî ameyî kiştene û bajar ame xirabkerdene, ame redkerdene. MHMEyî muracatê bi nameyê Omer Elçî û Orhan Tûnçî red kerd û verê muracatan çarna ra Mehkemaya Qanûno Bingeyênî (AYM) ya Tirkîye.

Avûkatanê doza Cizîrî ra Avûkat Ramazan Demîrî dîyar kerd ke qestê MHMEyî oyo ke rayîrê huqûqê mîyanên bixetimno û va: “Muracat hema zî AYMyî de yî û AYM qerarêk nêdano. Ez wazena paweyê qerarê AYMyî vindera. MHME seba muracatanê derheqê Cizîrî qerarê ‘nîno qebulkerden’ da. Qeraro ke ameyo dayîş nîno qebulkerdiş. Sewbîna MHME qerarê xo de vato ‘Hayîya ma cîdîyetê rewşe û mahîyetî ra esta.’ No qerar yeno o mana ke MHME şensêk dayo AYMyî. AYM goreyê rewşa ke MHME dîyar kerdo tênêgêreno. Do wextêk makul de reyna şêrî MHMEyî.  Ma do paweyê qerarê AYMyî vinderî. Ma zanenê ke huqûqnasê AYMyî timî şonî MHMEyî. Ma zanenê ke hukmat serê konseyî ra zor dayo mehkema. Yanî ma wina fikirîyenî ke MHMEyî rê vatî ‘şima nê dosyayan ma rê vera bidî.’ Her çiqas ke binpaykerdiş bibî, qetlîyamêko pîl bibo, delîl verê çiman de bî zî MHME qerarêko winasî da. Na rewşe nîşan dana ke do muracatê verên û yê nika ra dima de zî do wina bikerî.”

MHMEyî heta ke AYM qerar nêdo do qerar nêda

Avûkatanê doza Cizîrî ra Newroz Uysale derheqê qerarê MHMEyî de qisey kerde û va: “Qerar seba ma suprîzêko gird nêbi. Wextê dewamkerdişê qedexeyê tebervejîyayîşî de seba ke verê qetilkerdişî bêro girewtene ma muracat kerdibi. Mehkemaya Qanûno Bingeyênî o wext qerarê tedbîrî red kerd. Seba qebûlkerdişê tedbîran 5 qerarê MHMEyî estbî. Ma o wext vera qerarî vinetîme û nê qerarê Mehkemeya Qanûnê Bingeyênî MHME’yî rê şawitîbî. Redkerdişê qerarê tedbîrî xeylêk wext girewt. Redkerdişê qeraranê tedbîrî o taw zaf ameybî rexnekerdene. MHMEyî dimayê qerarê tedbîrî ra eşkeyene nê dosyayan padayo, la herinda padayîşî de nê sey dosyayê lezabezî girewtî, vat ke ê esas do biercnê û Tirkîye ra persa. Naye ser dosya dewam kerde.”

Newroz Uysale arde vîrî ke 13ê Teşrîna Peyêne de roniştiş ame kerdene û ard ziwan ke,  înan 3 serrî yo ke cehd kerdo ke doza MHMEyî dewam bikera. Uysale va: “Dimayê 13ê Teşrîna Peyêne ma qerar pawitene. Hewteyê naye ra ver vat qerar 7 Sibate de do bêro eşkerakerdene. Seba ke no yeno hewteyê serrgêra qetilkerdişî, ma şîme ser ke no tercîh bizanayîş ameyo dayene. Seba ke MHMEyî dosyaya ra baş zanitêne ke çi kotî, key qewemîyayo. Qeraro ke 45 rîpelî gêno ameyo dayene. Nê qerarî zî îqnakerdişê pêroyî ameyê nuştene. Çîyêko zaf mûhîm esto ke no qerar bi yewvengîye ameyo girewtene. Dosya nika hetê huqûqê zereyî de,  destê AYMyî de ya û MHMEyî zî heta ke AYM qerar nêdo ez do qerar nêdana;  wa qerar bido,  şima zî bado eşkenê muracat bikero yan nêkerê.” STENBOL