Çalakîya nobete ya KCDyî roja 9. de ya

Çalakîya nobete ya KCDyî ke seba piştîdayîşê Hemsereka KCDyî Leyla Guvena ke grevê vêşanîye de ya dîya dest pêkerdene roja 9. de dewam kena.

Hemsereka Kongreya Komela Demokratîke (KCD) û Parlamentera Partîya Demokratîke ya Şaran (HDP) ya Colemêrgê Leyla Guvena seba wedarnayîşê tecrîdê serê Rayberê PKKyî Abdullah Ocalanî 93 rojî yo ke grevê vêşanîye yê bêdem û anêgêrayîşî de ya çalakîya xo dewam kena. Sewbîna badê Guvene 291 hepsîyê ke seba eynî waştişan dest bi grevê vêşanîye kerdbî zî roja 55. de çalakîya domnenî.

Parlementerê HDPyî 31ê çele de seba piştîdayîşê Hemsereka KCDyî Leyla Guvene û hepsîyan awanîya KCDyî de dest bi çalakîya nobete kerdî. Çalakîya parlementeran roja 9. de dewam kena. Çalakîya ewro hetê Parlamenteranê HDPyî yê Rihaye Nusrettîn Maçîn û Parlamentera HDPyî ya Mûşî Şevîn Coşkune ra ameye dewrgirewtene.

Namzedê Hemşaredarîya HDPyî yê Amedî Selçûk Mizrakli zî mîyan de xeylê temsîlkarê komeleyan çalakîya parlementeran zîyaret kerdî û piştî dayî înan. AMED