Namzedê hemserekîye yê qezaya Qisle yê Dêrsimî

Qezaya Qisle ya Dêrsimî de, namzedê hemserekîya şaredarîye, Rahîme Kizilkane û Ozkan Arslanî va ke ma do şarê xo het de, bi kultur û îtîqatê xo tê bigêrê û bi nê esasan îdarekarîye bikerê.

Namzedê Yewîya Hêzî ya Şorişgêre ya Dêrsimî, hem merkez, hem zî qezayan de xebatanê xo yê weçînayîşî domnenê. Namzedê Yewîya Hêzî ya Şorişgêre do bi nameyê HDPyî bikewê weçînayîş. Qezaya Qisle de 500 weçînitox esto û Qisle bi zîyar û dîyaranê xo, kulturê Elewîyan de cayêko muhîm gêna. Zîyareta Duzgin Bavayî û Ocaxa Kurêşan na qeza de ya û nê bi xo zî seba Elewîyan mekanê zaf zaf muhîmî yê. Namzedan ra Rahîme Kizilkane  Komeleya Elewîyan a Demokratîke de rayîrberîye kerda û nika zî sey namzeda şaredarîye, Qisle de şarê xo reyde xebetîna. Ozkan Arslan zî sey aktîvîstê derûdorî no zanayene û o zî balkeşîya herême baş zano. Kizilkane û Arslanî derheqê xebatanê xo û derheqê projeyanê xo de qisey kerd.

Aktîvîstê derûdorî Ozkan Arslan serra 2011î de, seba ke vera projeyanê HESî û santralanê termîkan vejîyo ameyo tepiştene. Senî ke yeno zanayene, Cêvîyê Perê de projeyê 9 HESî, 1 santralê termîkî û 3 HESî bînî bîyî. Mahkemaye  Arslanî rê cikewtiş û şîyayîşê nê herêman kerdbi qedexe, la Arslan nika sey namzed agêrayo nê herêman û Qisle de xebatanê weçînayîşî keno.

Ma do îtîqat û kulturê xo bipawê

Arslanî bale ante îtîqatê Elewîtîye ser û va sey her cayê Dêrsimî Qisle zî ma rê zaf muhîm a û ma do xebatanê xo de hetê kultur û îtîqatî ra hîna bi dîqet bixebetîyê. Arslanî wina dewam kerd: “Qezaya ma de nufus zaf bîyo kêmî. Çunke şarê herême şert û mercan ver bar keno û tîya ra şono. Ma wazenîme ke wa şarê ma peyser agêro erdê xo ser û seba naye zî çi hewce bikero do ma bikerê. Ma wazenîme ke qeraranê xo şarê xo reyde bigîrê û bajarê xo pîya îdare bikê. Pêroyê zîyar û dîyarê ma ameyê qedexekerdene. Ma nêeşkenîme şime zîyaranê xo ser û îbadetê xo bikê. Seba îtîqatê Elewîtîye, seba mucadeleyê azadîye, seba mucadeleyê vera asîmîlasyonî, ganî her kes reyanê xo bido Yewîye ya Hêzî ya Şorişgêre ya Dêrsimî.”

Qisle do bi veng û rengê cinîyan aver şêro

Rahîme Kizilkane dewa Kurêş Bavayî de nîşena ro û vana seba îtîqat û averberdişê  kulturê xo ez bîya namzede. Kizilkane bale ante rewşa Qisle ser û va heta nika destê CHP de bîye û her ke şîye hem hetê nufus, hem hetê îtîqat û kultur, hem zî hetê ekonomî ra her ke şîya bîya xirabe. Kizilkane va ma do bi reng û vengê cinîyan, Qisleye do newe ra awan bikerê. DÊRSIM