Pîran de qerarê bedilnayîşê cayê 13 sindoqan ame dayene

Qezaya Pîran ya Amedî de cemednayîşê qeydê weçînitoxan ra dima na reye qerarê yewkerdişê 13 sindoqan û bedilnayîşê cayê înan ame dayene. HDP qerarî rê îtîraz kerd.

Badê weçînitoxanê xeyalî nika zî qerarê yewkerdişê 13 sindoqanê cayê cîya-cîyayan ame dayene. Xeylê qeza û bajaran de weçînitoxê xeyalî awanîyê vengan û axuran de ameybî qeydkerdene. Qezaya Pîranî ya Amedî de vejîya raşte ke qerarê sindoqê weçînitoxan bikerî yew ameyo dayene. Qezaya Pîranî ya Amedî de badê ke lîsteya weçînitoxan ame daliqnayene qeydê 40 weçînitoxan ameyî cemednayene û merkezê Amedî de zî qeydê 656 weçînitoxan ame cemednayene.

Weçînayîşê 24ê Hezîrane de zî serê waştişê walîtîyanê 20 bajaran herême de bi mehneya ‘asayîşê weçînayîşî’ cayê sindoqan ameybî bedilnayene. Wan, Dêrsim, Şirnex, Sêrt, Mêrdîn, Qers, Colemêrg, Erzîngan, Erzirom, Xarpêt, Amed, Bedlîs, Çewlîg, Êlih û Agirî zî mîyan de 20 bajaran de sindoqê 144 hezar weçînitoxan ameybî bedilnayene.

Na rewşe nika zî weçînayîş ra ver qezaya Pîranî de kerdî dewre. Heyetê Weçînayîşî yê Qeza qerar da ke cayê 13 sindoqan bikerî yew. Rêxistina Partîya Demokratîke ya Şaran (HDP) ya Amedî îtîrazê qerarî kerd. AMED