Maya Sîsê rê zulm yeno kerdene

 

 

Parlamenterê HDPyî yê Mêrsînî Ridvan Turanî eşkera kerd ke Maya Sîsê nêeşkena bi tena sereyê xo îhtîyacîyanê xo bica biyaro û vat: “Zîndan de mîyanê çar dêsan de pîrika 85 serrî rê zulm kenê.”

Sîsê Bîngol a 85 serrî ya ke Zîndanê Cinîyan ê Tarsûsî de ya, 2ê Teşrîna peyêne de amîbî berdene bi Nêweşxaneyê Fakulteya Tibî ya Unîversîteya Mêrsînî. Bîngole 8 rojan nêweşxaneyî de amîbî dermankerdene û dimayê 8 rojan amebi vatene ke mîyanê 15 rojan de do raporê ci bêro hadrekerdene. Unîversîteya Mêrsînî derheqê Sîsê Bîngol a 85 serrî de rapor hadre kerdibi û vatibi ‘Se ra 97 fonksîyonê bedenê aye bîyê vîndî, mendişê aye yê zîndanî seba cuya aye bitehluke yo.’ Dimayo ke Unîversîteya Mêrsînî rapor hadre kerd û 19ê Teşrîna peyêne de şirawit Sazîya Tibî Edlî (STE) rê û avûkatanê Sîsê Bîngole muracatê STEyî kerd û waşt ke Sîsê Bîngole bêro veradayene. La temsîlkaranê STEyî dimayê muayeneyanê Bîngole ra raporêk amade kerd û raporî de wina va: “Kena ke xo nêweş ramojno. Eşkena zîndanî de bimano.”

Parlamenterê Partîya Demokratîke ya Şaran (HDP) yê Mêrsînî Ridvan Turanî eleqedarê halê weşîye yê tepişteya nêweşe Sîsê Bîngole (85) de qisey kerd û da zanayene ke Maye Sîsê nêeşkena bi tena sereyê xo îhtîyacîyanê xo bica biyaro û va: “Zîndanî de mîyanê çar dêsan de pirîka 85 serrî rê zulm kenê.”

Halê maye Sîsê giran o

Turanî ard ziwan her ke şino halê Sîsê Bîngole giranêr beno û nay era nêweşxaneyî raporê “nêeşkena zîndanî de bimano” dayo. Turanî bale ante ke ganî Sîsê şert û mercanê rindan de bêro tedawîkerdene û va: “Înan a berde nêweşxane zî, labelê binê tecrîdî de ameye tedawîkerdene. No metodê tedawî rast nêyo, bêhuqûqî û bêedaletî yo. Cinîyêka 85 serrî ranzaye rê yena kelemçekerdene û tedawîkerdene. No çîyêko exlaqî nêyo. Maye Sîsê nêeşkena bi tena sereyê xo îhtîyacîyanê xo bica biyaro. Embazê aye hetkarîya ci kenê. Cilanê aye ra bigîrê heta rakewtiş û roniştişê aye embazê ci hetkarîya ci kenê. Ancax bi nê hawayî eşkena biciwîyo. Maye Sîsê serê 85 serrî de ya. Nê emrî de nêeşkena bi tena sereyê xo îhtîyacîyanê xo bica biyaro.”

 Maye Sîsê rê zulm yeno kerdene

Turanî nêrazîbîyayîşê xo hemverê raporê Sazîya Tibê Edlîyî (ATK) de ramot û wina va: “ATK rixmê raporê Unîversîteya Mêrsînî yê ‘se ra 97 fonksîyonê bedenê Maye Sîsê vîndî bîyê, mendişê aye yê zîndanî cuya aye rê bitehluke yo’ de raporêko sosret û teberê exlaqî de seba Maye Sîsê hadre kerd. Ma raste rast hemverê dramayêka merdimîye de yê. Maye Sîsê bi hawayêkê bêhuqûqî û bêqanûnî zîndanî de yena tepiştene. Gama ke mesela bena Kurd, her ca de rastê nizdbîyayîşanê xiraban yenê. Gama gişta yew paştîgêrê AKPyî ra gonî yena heme îmkanî yenê serferberkerdene. La gama Kurd bo ê kesî mergî rê têrî yenê verdayene. No zulmêk o serê Maye Sîsê de û ganî tavilî no zulm biqedîy û Maye Sîsê bêro veradayene.”

Mûşî ra surgunê Tarsûsî kerde

Sîsê Bîngole Nîsan a 2016î de dewêka Gimgimî ya Mûşî de keyeyê xo de amî destbendkerdene û bi îdîaya ‘endamîya organîzasyonî’ amî tepiştene û înan a şirawite Zîndanê Tîpê Fyî yê Mûşî û Hezîran a 2016î de seba sebebanê weşîya amî veradayene. La Bîngole roniştişê ewilênî yê Nîsan a 2017î de bi îdîaya ‘hetkarî daya organîzasyonî’ 4 serrî û 2 mengî ceza aye rê ameye dayene û reyna şirawitî zîndanê Mûşî. Dimayê wextêk ra Bîngole zîndanê Mûşî ra amî şirawitene bi Zîndanê Cinîyan ê Tîpê Tyî yê Tarsûsî.  AMED