Kesê ke qayûman şibênenî Xizirî rayîr ra vejîyayî

Pîr û anayê elewîyan reaksîyon nîşanê dedeyê cemxaneyî ke qayûmo ke tayînê Şaredarîya Dêrsimî bibî şibênabî Xizirî dayî. Pîr û anayê elewîyan wina vatî: “Dedeyê ke rizayê şarê ma nêgênî û qayûm şibênenî Xizirî rayîr ra vejîyayî. Wa Xizir hetê ci de bo.”

Dedeyê Cemxaneya Merkezî ya Dêrsimî Seyît Mehmet Halîsî qayûmo ke tayînê Şaredarîya Dêrsimî bîyo şibênabî Xizirî. Hemwelatîyê elewî reaksîyon nîşanê rewşe dayî. Pîr Zeynel Kete dîyar kerd ke bawerîya elewîtî de bê rizaya komelî ti çîyêk nîno kerdene û va: “Bê rizaya merdiman kes nêeşkeno bikewo keyeyê talîbê pîrî zî. Ganî vernî rizaya keye bêra girewşene. Hetê ma de bê riza kes wayîrê watiş û qerar nîyo. Qayûm bi rizaya şar nêame. Kesê ke bi rizaya ma bîyî şaredar nika zindanan de yî. Şaredarê tewqîfkerde bi rizaya elewîyan ameyî weçînayîş. Ma îqrar da înan.”

Kete dewamê qiseykerdişê xo de da zanayene ke azadîya heqîqet binê zor û zehmetîyan de yo û va: “Xizir, azadî û heq o. Eke heq çin bo, Xizir zî çin o. Eke Xizir bibo, heq zî esto. Xoceyek wirzeno û qayûm şibêneno Xizir. No yeno o mana ke yarîya xo bi aqilê Xizirî keno. bawerîya ma de cayê vatişê no xoceyî çin o. Îradeya azad bi îqrar û riza esto. Bawerî û xozaya ma ser de zilmêk esto. Kesê ke hemverê nê zilman de vengê xo nêvejenî senî benî Xizir. Bawerîya ma de Xizir sey Hz. Alî û mumînan o.”

Kesê ke heqîqet xesp kenî û nê kesan şibênenî Xizirî bêedeb î

Hemsereka Komeleya Elewêyê Demokratîke (DAD) Selda Guneşe zî wina va: “Xizir goreyê kesan nêbedilîyeno. Seba elewîyan zaf bimbarek o. Xizir heqîqet o. Eke xoceyêk kesê ke pî, kal û domananê înan qetil kerdî û kenî şibêneno Xizirî, no xoce kewto rayîr. Kesê ke wina qisey kenî ma ra nîyî. Kesê ke heqîqet xesp kenî û nê kesan şibênenî Xizirî bêedeb î. Xizir hetkarîyê no xoce bikero. Rayîro raşt nîşanê ci bido.”DÊRSIM