Hîna ke Merkele nêşîya partîya ci sîyasetê bextwaştoxan vurnena

Verê şîyayîşê serekwezîra Almanya Merkele, partîya aye dest kerd ci ke sîyaseto ke berê welatî bextwaştoxan rê kerdo a bivurnê. CDU yo ke dest bi komxebata di rojan kerda, plan keno ke prosesê teberkerdişê sînorî û kontrolkerdişê sînoran hîna pêt bikero.

Yewîya Xirîstîyan a Demokratan  (CDU) ya ke 14 serrî yo Almanya de îqtîdar de ya, kongreya xo ya ke 14 Kanûne de viraştîbî de Annegret Kramp-Karrenbauere sey serekê pêroyî ameyebî weçînayene. Angela Merkela ke 18 serrî yo serekîya partîya xo caverda, vatbî ke a do sey serekwezîre bimana. Sîyasetmedarê CDUyî yê  ke çapemenîya Almanî rê qisey kerdo ard ziwan ke hema hema pêroyî ci wazenê ke sîyasetê bextwaştoxan o ke serekwezîre Merkele reyde yeno qiseykerdene ganî bêro vurnayene.

Hetkarê serekê pêroyî yê CDUyî Thomas Stroblî, ajansê xebere yê Almanî DPAyî rê qisey kerd ard ziwan ke ê bextwaştişoxê ke kewtê mîyanê sucan nêeşkena welatî ra bierzê û vat, “Ganî ma teberkerdişê sînorî asan bikerê”.

Sekreterê pêroyî yê CDUyî Paul Ziemiakî zî ar ziwan ke hem Almanya û hem zî Ewropa rê seba bextwaştoxan sîyasetêkê newe lazim o û vat ê wazenê ke komxebate bi netîcayanê şênberan biqedinê. Roja dîyina komxebate de zî vera bextwaştoxan babeta pawitişê sînoran senî hîna zêde do bêro seveknayene ser o yenê têhat.

Goreyê CDUyî, nê demanê peyênan de semedê rayvîndîkerdişî û Almanya de alternatîf bîyayîşê partîya hedravîyarte ya rastgire (AfD) rîyê sîyasetê Merkele yê baxtwaştoxan bi. Nê semedî ra CDU, verê weçînitişê ke menga Gulane de hem Parlamentoyê Ewropa de, hem zî zaf eyaletan de do bêrê viraştene de wazeno ke no sîyaseto ke Merkele reyde yeno zanayene bivurneyo. Amancê CDUyî yo nikayin weçînitoxê ke şîyê hetê AfDyî înan reyna apeydegiretiş o. Armancê Merkele zî oyo ke rixmê zextê partîya xo heta serra 2021 binçengê serekwezîrîye de mendiş o.

Seba ke 2015 de serekwezîre Merkele bêrê Almanya nêzdîyê mîlyonêk bextwaştoxanê rê akerdî, welatê xo de reaksîyonêko gird dîbî. La seba ke Merkele bextwaştoxê ke welatanê Balkanan de tenge de mendîbî serra 2015î de girewtî welatê xo û vat “Ma do ser bikewê”, aye tarîxê Almanya yê nêzdî de cayê girewtîbî. Vera sîyasetê Merkele yo ke “Bextwaştoxan rê sîyasetê xeyr ameyî” de rexnekerdiş tewr zêde hetê CSUî ra ameybî kerdene. BERLÎN