aram

Cinîyanê HDPyî buroyê weçînitişî akerd

Qezaya Depî ya Xarpêtî de buroyê weçînitişî yê cinîyan ê HDPyî ame akerdene. Namzeda qezaye Mutlu vat ke ma do heqê ma ke ameyî xespkerdene pêser bigêrê.

Partîya Şaran a Demokratîke (HDP) Depê Xarpêtî de buroyê cinîyan ê weçînitişî akerd. Namzeda hemserekîye ya şaredarîye Serap Dogan Mutlu, xebatkarê HDPyî yê qezaye û xeylî kesî tewrê akerdişê buroyî bîyî. Mutlu ke akerdiş de xitabê cinîyan kerd vat ke no weçînitiş de do tarîxê ma cinîyan o ke nêameyo nuştene, ma binusê û heqê ma ke hetê hukmat ra ameyî xespkerdene nînan pêser bigêrê.

Ma do sandiqan de hesab bipersê

Mutlu bale ante qeyûman ser û va: “Verê qeyûman şaredarîyanê ma bi ziwanê ma yo ke qedexeyo xizmet dayêne. Parkî, merkezê kultur û weşîye akerdî.  Semedê şarî xizmet kerdêne. La ewro hemşaredarê ma bêhuqûq zîndanan de yê. Ma do hesabê nînan sandiqan de bipersê. Êyê ke îradeyê Depî nas nêkenê ma zî înan nas nêkenê. Şaredarîye ke qeyûm înan rê ameyo tayînkerdene, bêrê xo şarî rê qefilnayî. Ma rixmê heme polîtîkayanê tecrîdî û hêrişan xoverdayîşê xo rê dewam kenî. Ma bi fedekarîya girde ameyî nê rojan. Qet çew nêeşkeno destkewteyanê ma bigêro. Ma do pero pîya tê bigêrê, darbanê dadîyan, cinîyan bipêşê û semedê caardişê waştişê şarî mucadele bikerê. Ma do heqê xo yê temsîlîyetê seypêyî yo ke ameyo xespkerdene pêser bigêrê. XARPÊTÎ