aram

Festîvala Fîlmê Kurdî ya Stenbolî dest pêkena

Festîvala Fîlmê Kurdî ya Stenbolî 6-10ê Adare de do bêro viraştene. Do festîvale de 33 fîlmî û belgefîlmî bêrê ramotene.

Rojanê 6-10ê Adare de do Festîvala Fîlmê Kurdî ya Stenbolî bêro viraştene. Do festîvala ke hetê Mezopotamya Sînema ra bêro viraştene de 33 fîlmî û belgefîlmî bêrê ramotene. Mîyanê nê fîlm û belgefîlman de fîlmê “Çîrkîn Kral Efsanesî” yê Huseyîn Tabakî, fîlmê “Zagros” ê Sehîm Omer Kalîfayî, fîlmê “Reşeba” yê Huseyîn Hasanî, fîlmê “Zor Bîr Karar” ê Ender Ozkahramanî, belgefîlmê “Bîr” ê Veysî Altayî û fîlm û belgefîlmê Komuna Fîlman a Rojawanî bêrê ramotene.

Fîlmî do salona Mezopotamya Sînema ya Beyoglu de bêrê ramotene. Koordînatorê festîvale Hebûn Polat û Adar Taşî derheqê festîvale de hayîdarîyî pare kerdî.

Polatî vist vîrî ke Mezopotamya Sînema 2 serrî verî zî heman xebate kerda û vat, “Par rîyê halê sîyasîyî ra ma nêviraşte. Emser ma şîyî Dihok, Berlîn, Hambûrg û Amed. Ma munaqeşeyî kerdî û qerar da ke ma festîvale virazê.” Polatî ard ziwan ke Stenbol de fîlmê Kurdkî nênê ramotene û ê do cehd bikerê ke bi na festîvale fîlmanê Kurdan hîna vejê vernî. Polatî da zanayene ke do xeylî dîrektorî tewrê festîvale bibê û vat, “Çar perçeyê Kurdistanî ra fîlmî estê. Ma Ewropa ra zî fîlmêk weçînit. Do her perçeyanê Kurdistanî ra dîrektorî bêrê. Heman wextî de do 15-20 dîrektorî vakûr ra zî bêrê.” Polatî veng da heme sînayoxanê sînemaye.

Do 8ê Adare de fîlmê dîrektoran ê cinîyan bêrê

Koordînatorê festîvale Adar Taşî zî ard ziwan ke do 8ê Adare de fîlmê cinîyan zî bêrê ramotene. Taşî vat ke cinîyî wareyê sînema de zî yenê eciqnayene û va: “Keda cinîyan, keda dîrektoran ê cinîyan nêna dîyene. Sebebê nê zî fehmê camêrdî yo. Naye ra bitaybetî ma 8’ê Adare weçînit. Do 8ê Adare de fîlmê cinîyan bêrê ramotene. Ma waşt ma bala cimatî biancê serê dîrektoran ê cinîyan û xebatanê înan ê wareyê sînemaye.” Taşî seba tewrbîyayîşî veng da heme sînayoxanê sînemaye.

Programê festîvale

* 06 Adare-Saet 19.30 Akerdişê Festîvale. Dima do belgefîlmê Bîr’î bêro ramotene.

* 07 Adare- Saet 13.00 Panelê derheqê sînemaya Kurdan.

* Saet 15.00 Fîlmê “Acemî Avci” yê Sahim Omer Kalîfayî, fîlmê “Eksîk” ê Halîs Saritagî, fîlmê “Sîs” ê Ferdî Taşkirî û fîlmê “Her malek dibistanek” ê Ardîn Dîrenî.

* Saet 17.00 Fîlmê “Çîrkîn Kral Efsanesî” yê Huseyîn Tabakî.

* Saet 19.30 Kayê “Tenê Ez” ê Teatra Jiyana Nû.

* 08 Adare- Saet 13.00 Fîlmê “Prenses model” ê Dîlan Ergînî û fîlmê “Gazîn” ê Ann Sophie Perssone.

* Saet 17.00 Fîlmê “Çember” ê Rûken Tekeşe, fîlmê “Sinirsiz Oyunlar” ê Elîf Yîgîte, fîlmê “Tebeşîr” ê Ozge Astane, fîlmê “Siradan Bîr Gun” ê Nalîn Acare û Adar Taşî û fîlmê “Pencere” ê Rezzan Bayrame.

* Saet 19.30 Fîlmê “Reşeba” ê Hussein Hasanî.

* 09 Adare Saet 13.00 Fîlmê “14’ê Tîrmehê” yê Haşîm Aydemîrî.

* Saet 15.00 Fîlmê “Bîr Ulke Vardi” yê Hebun Polatî, fîlmê “Madûn” ê Duzgun Akdenîzî, fîlmê “12*1 fîlm” ê Komuna Sînema ya Rojawanî, fîlmê “12 Building” ê Amîr Gholamî.

* Saet 17.00 Fîlmê “Jina bê jiyan” ê Kaveh Moeinfarî.

* Saet 19.30 Fîlmê “Zagros” ê Sahîm Omer Kalîfayî.

* 10 Adare – Saet 13.00 Fîlmê “Oy” ê Ateş Alparî, fîlmê “Kumun Gecesi” yê Alî Gulerî, fîlmê “Cumartesî Duşu” yê Alper Kizilbogayî, fîlmê “Darên Bi Tenê” yê Komuna Sînema ya Rojawanî.

* Saet 15.00 Fîlmê “Zor Bir Karar” ê Ender Ozkahramanî.

* Saet 17.00 Fîlmê “Kemberên Behrê” yê Amîr Gholamî, fîlmê “Arada” yê Alî Kemal Çinarî.

* Saet 19.30 Fîlmê “Yansima” yê Veysî Altayî, fîlmê “Yikintilar Arasinda” yê Ozcan Alperî, fîlmê “Ulke ve Toprak” ê Hîcran Urun û Zana Kîbarî. STENBOL