aram

Hunermend û roşinvîran seba Guvene veng dayî: Wêşanîye nê, bêvêngîye mirnena

Merkezê Xeberan

Hunermend û roşinvîran waştî ke talebê Leyla Guvene ya ke grevê vêşanîye de ya bêrê qebûlkerdene û domnayî: “Vêşanîye nê, bêvengîye mirnena. Wa şar wayîrê xoverdayîşê Guvene bivejîyo.”

Hunermend, roşinvîr, nuştox û şaîran, rojnameyê Yenî Yaşamî ra Elîf Aydogmuşe rê qisey kerdî û vatî tecrîd bêhiqûqîye yo. Hunermend û roşinvîran bale antî heqê ciwîyayîşî ser û dîyar kerdî ke ganî wezîfedarî seba mergê merdiman nê, seba ciwîyayîşê merdiman tê bigêrê.

Levent Uzumcu: Wezîfedarî ganî weşîya ê canan bipawê

Aktor Levent Uzumcu: ”Yew welat de ke mergê merdiman ê grevê vêşanîye sey serkewtiş bêro dîyayene, o welat de ganî her kes xo ra şerm bikero. Yew merdim eke bi canê xo yew xeletîye protesto keno, o wext ganî wezîfedarî ronişê û tayê bifikirîyê. Wezîfedarî mergê ê kesan nê, weşîya ê kesan bipawê ganî, karê dewlete zî no yo xora.”

Orhan Alkaya: No halê huqûqî ra dûrîkewtişê dewlete musneno

Aktor Orhan Alkaya: “Leyla Guvene bi reyanê şarî bîya parlamentere. Ma hemserekîya şaredarîye zî ke bihumarê, temsîlkara şarî ya xalise ya. Tecrîd yeno manaya bêhiqûqîya bingehêne û Leyla Guvene zî vera tecrîdî û seba ke parlamento de heqê îfadeyê ci zî ameyo birnayene kewta grevê vêşanîye. Na rewşe halê hiqûqî ra durîkewtişê dewlete musnena. Eke mi bizanitêne ke ez nêtîce gêna, ez do verê Leyla Guvene de biameyêne çok û bigêrayênê aye ver ke wa grevê xo biqedîno. Çunke heqê ciwîyayîşî yê temsîlkara şarî ya xalise esto.”

Barbaros Şansal: Huqûqo adîlane şert o

Dîzaynkarê Modayî Barbaros Şansal: “Vengê Leyla Guvene welatê vêşanê demokrasî, azadî û huqûqî ra beno berz û pêroyê dinyaye ra bîyo vila û peyamê xoverdayoxan dano dinyaye. Tecrîd, teda, îftîra û otokrasî nêeşkenê verê mucadeleyê şaran bigîrê û wa û biratîya înan ver de astengîye bivirazê.”

Ahmet Tellî: Na herfa alfabeya xoverdayîşî ya peyêne ya

Şaîr Ahmet Tellî: “Grevê vêşanîye yê Leyla Guvene, eslê xo de yew qîrayîş o. Ancax kesê wayîrê wîjdanî eşkenê biheşnê. Eke goşê ê wijdanî kerr ê o wext ê vengî nêheşneno. Na herfa alfabeya xoverdayîşî ya peyêne ya.”

Ahmet Umît: Edalet bibo ke kes seba edaletî canê xo nêdo

Nuştox Ahmet Umît: “Yew welat de ke merdim bi canê xo edalet ra bigêro, o welat de her kes xemgîn û xirab o. Ganî welat de edalet û azadîyeyêka winasîye bibo ke merdim bi canê xo ci ra nêgêro.”

Metîn Kahraman: Ganî destr nêdîyo mergê xoverdayoxan

Hunermend Metîn Kahraman: “Leyla Guvene vera rewşa antîdemokratîke ya serranê peyênan kewta nê xoverdayîşî. Ma 12ê Êlule ra hîna xirab deman de ciwîyenê. La ma ancax bi xoverdayîşan nê deman do bivîyarnê. Ez û kekê xo Kemal wazenê ke  destur nêdîyo mergê xoverdayoxanê grevanê vêşanîye.”

Fûsûn Demîrele: Ganî talebî hema nika bêrê qiseykerdene

Aktore Fûsûn Demîrele: “Helbet grevê vêşanîye de bîyayîşê Leyla Guvene seba ma xengînî ya. Ganî ca de talebî bêrê qiseykerdene.”

Mam Ararat: Ganî talebî bêrê qebûlkerdene

Hunermend Mem Ararat: “Tecrîd bêşik anorê merdiman şikneno û çîyêko xirab o. Tîya de problemê Kurdan o ke êdî bîyo kud esto. Her roje çareserîye ra hîna dûrî keweno û rewşa winasîye de ganî merdim goşdarîya na çalakîye bikero. Nê talebî bihaştîyane yê û wezîfedarî ganî cewabê nê taleban bidê. Leyla Guvene bi reyanê şarî bîya parlamentere û ganî na rewşe baş bêro fehmkerdene. Ez yew Kurd û yew hunermend a û na rewşe mi kena xemgîn. Ez hêvî kena, hîna ke merg nêbîyo, na mesela do çareser bibo.”

Denîz Turkalîye: Tecrîd teberê qanûnî de yo

Aktore Denîz Turalîye: “Ez zaf xemgîn a, warekna grevê vêşanîye nêbîyene. Ez Leyla ra zaf hes kena. Tecrîd teberê qanûnî de yo. Ez wazena ke tecrîd binê ra bêro çinêkerdene. Îtîrazê mi bi tecrîdî esto.”

Ozcan Alper: Ez hêvî kena ke veng bêro heşyayene

Dîrektor Ozcan Alper: “Leyla Guvene yew dayîke ya, yew cinî û yew parlamentere ya û seba ke tecrîd bêro wedaritene û şert û mercê haştîye bêrê ronayene kewta grevê vêşanîye. La çi heyf ke seba ke vengê ci nêro heşnayene, her çîyî kenê. Ez hêvî kena ke vengê ci bêro heşnayene.”

Veysî Altay: Ma nêbê şîrigê nê sûcî

Dîrektor Veysî Altayî va: “Tecrîd bedenî ra zîyadêrî, fikrê merdimî esîr gêno û karakterê merdimî keno parçe. Dewlete, hetê sîyasîyî ra sûcê tecrîdî kena. Şikitişê tecrîdî bi reaksîyonê ma mumkin o. Reyna weşîya Leyla Guvene û embazanê ci zî bi reaksîyonê ma mumkin a. Bi tecrîdê serê Îmraliyî, kenê ke ma pêroyînan esîr bigîrê. Ma ke vengê xo mevejê, meşte bîro ke merdimî merdî, o wext ma zî qasê dewlete benê sûcdar. Ganî ma nê sûcî de nêbê şîrig.”

Melda Onure: Wa dewlete goşdarîya nê taleban bikera

Parlamentera CHPyî ya verêne Melda Onure: “Nê talebî talebê haştîye yê. Her çiqas ke kemasîyê ci bibê zî, nê welatî de prosesê haştîye ame awankerdene. Mabênê rewşa nikayî û prosesê haştîye de ferqêko pîl esto û haştîye her çîyî ra hîna muhîm a. Bi şer û pêkewtişî çîyê çareser nêbeno û serranê 90î de zî ma baş fehm kerd. Ganî bi lezkanî, seba haştîye û çareserîye game bêro eştene. Îqtîdar ganî goşdarîya taleban bikero.”

Ferhat Tunç: Ganî ma xoverdayîşî rê hîna zêde wayîr bivejîyê

Hunermend Ferhat Tunç: “Ez derheqê rewşa weşîye ya Leyla Guvene de qisawet kena. Hepisxaneyan de, nêzdîyê 300î girewteyî grevê vêşanîye de yê û hetê weşîye ra asta krîtîke de yê. Huqûq de cayê tecrîdî çin o. Bi polîtîkaya tecrîdî kenê ke heqanê ma yê merdimahîye çin bikerê. No sebeb ra zî grevê vêşanîye meşrû yê. Ma pêrune dî ke prosesê haştîye û dîyalogî senî baş o. Leyla Guvene bi can û bedenê xo bîye serkêşa nê xoverdayîşî û kena ke seba haştîye, seba azadîye, seba demokrasî game bêro eştene. Hunermendî ganî her kesî ra hîna zêde wezîfe bigîrê xo ser û vengê nê xoverdayîşî bikerê berz.”

Îlkay Akkaya: Her kes cayo ket ede yo, uca de vengê xo berz bikero

Hunermende Îlkay Akkayaye: “Beno ke merdim sey prensîp grevê vêşanîye qebûl nêkero, la ganî xo vîr ra nêkero ke heqê ciwîyayîşî zî çîyêko pîroz o û ganî bêro pawitene. Na çarçewaye de, seba wedaritişê tecrîdî ganî merdim xo ver bido. Grevê vêşanîye rest asta krîtîke û ganî her kes cayo ke tede yo, uca de vengê xo bikero berz.”