aram

Şarê Dêrsimî do xo bi xo îdarê bikero

Yewîya Hêzî ya Şorişgêre Dêrsimî buroyê xo yo dîyin ê weçînitişî taxa Sîhenkî de akerd. Îdarekerdox û pabesteyan reyde zaf zî hemwelatijî tewrê akerdişî bîyî.

Yewîya Hêzî ya Şorişgêre Dêrsimî buroyê xo yo dîyin ê weçînitişî taxa Sîhenkî de akerd. Verê akerdişî buroyî hemserekê Partîya Demokratîke ya Şaran (HDP) yê Dêrsimî Hidir Çîçekî qisey kerd û ard ziwan ke, qeyûmê ke seba Şaredarîya Dêrsimî ameyê tayînkerdene, dewamê polîtîkaya dewlete ya 150 serran a û ê vera na polîtîka têkoşînê xo do bidomnê.

Namzeda hemserekê merkezê Dêrsimî ya Yewîya Hêzî ya Şorişgêre Nurşat Yeşîlî Leyla Guvene û çalakwanê grevê vêşanîye silam kerdî. Yeşîlî bale ante serê muhîmîya weçînitişê cîyayan ê 31ê Adare ser û va: “Ma tîya  teyna buroyê weçnitişî anêkenê. Ma do kelemçeyo ke dayo îradeyê ma ro  bivisnê û bierzê. Dêrsim bajarê cinîyan o, no têkoşîn, têkoşînê cinîyan ê vera zîhnîyetê camêrdî yo. No semed ra ma weçînitişê 31ê Adare zaf muhîm vînenê. Ez heme cinîyan dawetê têkoşînî kena. Ma verê ci senî ê kesê ke îradeyê ma xesp kerdo bi sindiqan  dayê waro, 31ê Adare zî ma pîya wina bikerê.”

Namzedê hemserekê Yewîya Hêzî ya Şorişgêre Hidir Demîrî zî wina qisey kerd: “Rojdemê ma yo tewr verên qeyûman ra xelisîyayîş o. Na perse ra dima ma şarê xo reyde seba çîyanê ke do bêrê kerdene qerar bidê. Seba Dêrsimî zaf seferî bîyî la serkewtiş nêbi. Naye ra dima zî do nêbo. Şarê Dêrsimî do xo bi xo îdarê bikero.Ma seba naye têkoşîn danê.”

Qiseykerdişan ra dima buro ame akerdene û bi  kaykerdişê govendî  qedîya. DÊRSIM

Dikarî Biecibînî