aram

Dewa Baxozî de 20 rojan de 9 hezar sivilî ameyî tehlîyekerdene

HSDyî mabanê 9ê Sibate û 1ê Adere de zafê înan çeteyê DAIŞî û keyeyê înan 9 hezar sivîlî Baxozî ra xelisnayî û vera çeteyanê ke teslîm nêbîyî operasyon da destpêkerdene.

Şerwananê Hêzê Sûrîyeya Demokratîke (HSD) operasyonê vera çeteyanê DAIŞî yê dewa Baxozî ya pabesteya Hecînî yo ke seba ke sivîlan destê çeteyan ra bixelisnê 9’ê Sibate de mabên dabi ci, vizêr şan reyna da destpêkerdene.

9ê Sibate ra heta nika bi hezaran sivîlî û çeteyê DAIŞî û keyeyê înan ê ke Baxoz de bî ameyî tehlîyekerdene û ameyî berdene bi cayanê biasayîşî. Çeteyê ke zafê înan xerîb î, tehlîyekerdiş qebûl nêkerd û vanê ke ê do şer bikerê. Nê çeteyê ke hûmara înan nêzdîya 500yî ya vera înan operasyon ame destpêkerdene.

Goreyê zanayîşo ke HSDyî dayo ANFyî mabanê 9ê Sibate û 1ê Adere de zafê înan çeteyê DAIŞî û keyeyê înan 9 hezar sivîlî Baxozî ra xelisnayî û vera çeteyanê ke teslîm nêbîyî operasyon dayo destpêkerdene. Goreyê fermandaranê HSDyî çeteyê ke Baxoz de mendî zafê înan Rojakewtena Dûre, Komarê Tirkî, Welatê Ewropa, Çeçenistan û Tirkîye ra yî.

Fermandaranê HSDyî ra Ednan Efrînî vat ke bi hezaran sivîlî û çeteyê DAIŞî û keyeyê înan ke Baxoz de bî ameyî tehlîyekerdene. 1ê Adere  de dewe de sivîlî nêmendî û çeteyê ke teslîm nêbîyê vera înan şerwananê ma dest bi operasyonî kerd. Despêkerdişê operasyonî ra dima herême de pêkewtişê giranî ameyî ciwîyayene. Bînşewe heta serê sibayî Baxoz de şer giran bi. HSDyî da zanayene ke ê hîrê hetan ra aver şîyê.

Hetê bînî ra bi hezaran çeteyê DAIŞî û merdimê înan ke ameyî tehlîyekerdene semedê Vakur û Rojakewtena Sûrîye tehlukeyêko gird ê. DÊRAZOR