aram

Yewîya Hêzî ya Şorişgêre Dêrsimî buroyê cinîyan akerde

Namzedê Yewîya Hêzî ya Şorişgêre Dêrsimî buroyê weçînayîşî yê cinîyan akerde

Namzedê Yewîya Hêzî ya Şorişgêre Dêrsimî yê Hemşaredarîya Dêrsimî taxa Gazikî de buroyê weçînayîşî yê cinîyan akerde. Akerdişê boroyî de Parlamenterê Partîya Demokratîke yê Şaran (HDP) Pero Dundar, Alîcan Onlu, Kemal Bulbul, namzedê Yewîya Hêzî ya Şorişgeran, hemserekê qeza û xeylê temsîlkarê cinî hadrebî. Akerdişê buroyî de Namzeda Hemşaredarîye ya Dêrsimî Nurşat Yeşile qisey kerde û bale ante çalakîya grevê vêşanîye yê bêdem û anêgêrayîşî yê hemsereka KCDyî û parlementera HDPyî ya Colemêrgî Leyla Guvene ser û va: “Ma silamanê xo her kesê ke seba aştî, demokrasî û azadîye bedenê xo dayî verê vêşanîye rê erşawenî. Heme qezencê cinîyan bi bedêlanê giranan ameyî qezenckerdiş û nika zî hemverê erjê cinîyan de hêriş yenî kerdiş.”

Parlamentera HDPyî ya Mêrdîne Pero Dundare zî qiseykerdişê xo de dîyar kerde ke mesele herînayîşê awanîya şaredarî nîya û wina dewam kerde: “Mesele oyo ke ganî ma Dêrsimî teslîmê îqtîdaro faşîst nêkerî. Cok ra ganî ma tmî pîya bibî û hêzê xo bikerî yew. Bi no hawa ma do ser bikewî.”

Namzedê hemserekê Yewîya Hêzî ya Şorişgêre Hidir Demîrî zî wina qisey kerd û va: “Rojdemê ma yo tewr verên qeyûman ra xelisîyayîş o. Na perse ra dima ma şarê xo reyde seba çîyanê ke do bêrê kerdene qerar bidê. Seba Dêrsimî zaf seferî bîyî la serkewtiş nêbi. Naye ra dima zî do nêbo. Şarê Dêrsimî do xo bi xo îdarê bikero.Ma seba naye têkoşîn danê.”

Badê qiseykerdişan serkewtişê aştî, demokrasî û azadîye kevokê azadîye ameyî firnayîş û dima ra buro ame akerdiş. Buro bi zirne û govendan ame akerdiş. DÊRSIM