Wa zindanan ra cenaze nêvejîyî

Medîne Kiyaga ke dayîka Kadîr Kiyagî ke seba wedarnayîşê tecrîdî grevê vêşanîye de yo va: “Ma do bıherıki raşteyan.” Siddik Tamûrî ke pîyê Cîhan Tamûrî ke grevê vêşanîye de yo zî bale ant weşîya çalakgeran ser

Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 126. de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Badê Guvene çalakî vilayê heme zindana bî. Keyeyê Cîhan Tamûr û Kadîr Kiyagî ke grevê vêşanîye de yî veng dayî û dîyar kerdî ke verê ke zindanan ra cenaze bivejîyî ganî bêvengî raşte ra wedarîyo.

Medîne Kiyaga ke lajê aye Zindanê Tîpa Lyî yê Panosî de 13 rojî yo ke grevê vêşanîye de yo qiseykerdişê xo de wina va: “Ganî seba waştişê bi hezaran merdiman kes xo ker û lal nêkero. Leyla Guvene 4 aşmî yo ke grevê vêşanîye de ya. Eke zindanan ra cenaze bivejîyî do kam hesab bido? Ma nê ekrdişan qebûl nêkenî. Ma dayîk î. Eke lazim bikero ma do biherikî raşteyan. Xo ra ten ama loqêk şam wenî, ma do aye zî nêwerî. Ez veng dana Serekê Pêroyî yê AKPyî Erdoganî. Eke domanê to grevê vêşanîye de bibayêne to yê çi bikerdêne?”

Ma nêwazenî zindanan ra cenaze bivejîyî

Siddik Tamûrî ke lajê ci Cîhan Tamûrî Zindanê Wanî de 16ê Kanûna 2018î de dest bi grevê vêşanîye kerd da zanayene ke her ke şono lajê ci helîyeno û va: “Lajê  mi asan nîyo. Pêvînayîş degonî zincê ci ra ameyêne. Na çalakîye çalakîyêka merdimîye ya. Waştişê hepsîyan oyo ke huqûqo ke qanûnan de esto pê bêro. Ganî Wezîrê Edaletî goreyê qanûnan têbigêro. Ma nêwazenî zindanan ra cenaze bivejîyî. Eke cenaze bivejîyî do verê çimanê heme dinya de rezîl û rîsîya bibî. Ma nêwazenî çîyêko xirab bibo. Na merhela de saetêk daxî muhîm a. Seba ke zindanan ra cenaze nêvejîyî çina destê ma ra bêro ma do bikerî.” WAN

Dikarî Biecibînî