Xeyalê Nasir Yagizî umîdê serfirazîye kenê pîl

Yagizo ke rixmê rincanîya bedenê xo de xoverdayîşê xo bi qerardarîye domneno, ard ziwan ke xeyalê ci yo tewr pîl azadîya Ocalanî û bi hawayêkê azadî ciwîyayîşê ê yo û vat, “Rastîya Serek Apoyî û cuya ê hîna zaf hêz da mi û ez pê dimayê xeyalanê xo şîya.”

Nasir Yagiz, tarîxê 21ê Teşrîna peyêne ra nata seba wedaritişê tecrîdê serê Rayberê Şarê Kurdî Abdullah Ocalanî grevê vêşanîye yê bêdem-bêagêrayîşî de yo. Yagiz roja 113ine ya çalakîye de yo. Halê ci yê weşîye çende şino beno giran. Tewr peynî tarîxê 26ê Sibate de ame berdene bi Nêweşxaneyê Parî.  Dimayê kontrolê doktorî ra ê tedawîye red kerde û xoverdayîşê xo domna.

Her ke ma şinê serdana Yagizî ma xusûsîyetêkê ê yê bînî keşf kenê. Zîyaretê ma yê peyênî de ma vînenê ke Yagiz serê cayê xo de hîkayeya Eliyê Memedî û Seyrane ke dewanê Hesen û Heyderan da ravêrta goşdarî keno.  Dimayo ke ma Yagizî dir na hîkeyeya eşqî goşdarî kenê ma dest bi sohbetî kenê.

Çalakîya mi seba cuya azade ya Rayber Apoyî ya

Yagizî ard ziwan ke xeyalê ci yo tewr pîl azadîya Ocalanî û bi hawayêkê azadî ciwîyayîşê ê yo û vat, “Rastîya Serek Apoyî û cuya ê hîna zaf hêz da mi û ez pê dimayê xeyalanê xo şîya. Çalakîya ke ez nika virazena nê bingeyî de seba Rayber Apoyî dir pîya bi hawayêkê azadî ciwîyayîşî ya.”

Ez wazena ke fîlmê destana Elîyê Memed û Seyrê biancî

Dewamê sohbetî de ma eleqedarîya Yagizî ya huner û tîyatroyî zî mûsenê. Xeyalê ci yo dîyin o yo ke fîlmê destana Elîyê Memed û Seyrê bianco.

Yagizî va: “Qicîya mi ra meraqê mi bi tîyatro, kultur û hunerî esto. Domanîya ma de kalik û pîrikanê ma destan û macerayê Kurdkî ma rê qal kerdêne. Dewan de dîwanê dengbêjan ameyêne ronayene, dengbêjî ameyêne destan, macera û deyîrî vatêne. Mi tewr zaf zî nameyê Miradê Kinê şinawitêne. Vengê dengbêjan goşanê mi ra qe kemî nêbi. Ez dormeyêkê winayênî de bîya pîl. Seke şima zanê dewleta Tirkî verî ra hêrişê ercanê kultur, huner û cimatkîyan ê şarê Kurdî kena.  Gama ke ez tîyatroyî dir eleqedar bîyêne mi waştêne ke hîkaye, destan û şîîran bikerî fîlm yan zî belgefîlm.”

Rastîya eşqî ya kurdan û îxanet

Gama ke ma sebebê çira o na destane ser o hende vindeno, Yagizî wina qisey kerd: “Meseleyê Miradê Kinê ke tede babeta Elîyê Memed û Seyrê ravêrena dorê herême û dewa ma de qewimîyayo.  Kercews, Kerboran, koyanê dormeyê ma de û Misircê de virazîyaya. Elîyê Memed merdimê Hesen û Heydera yo ke axayê dewe yê. Dimayo ke pîyê ci wefat keno verê axayî de xebitêno û ci rê xizmet keno. Îskanê Gulîxane seba ke waştîya ê Seyrê bigêro îxanet Elîyê Memedî rê keno û bi xencerî ê kişeno û naye ser Seyrê xo dana dar û kemeran ro…

Na destane de rastîya eşqê Kurdan, îxanet û halê şarê herême ameyo ramotene. Heman wextî de Seyrê û Elîyê Memed heta mergê xo yewbînan rê aşiq manenê. Nê çîyî mi ser o zaf tesîr kerd.”

Ganî hunermendî rastîya cimatkîye ser o vinderê

Yagizî bale ante serê huner û hunermendî û nê vatî: “Huner yew neynika cimatî ya. Gama ke huner bieşko cimatê xo roşin bikero a game reseno rastîya xo. Dişmenî seba ke na rastîya kulturê Kurdan dîya û na zengînî dîya hêriş beno serê huner û kulturê Kurdan. Xusûsen zî waşto ke tarîxê ma raste ra wedarê. Naye ra ganî ma zî tewr zaf qîmet bidê huner û kulturê xo.

Ez umîd kena ke xebatê hunermendkî, dengbêjkî û yê kulturkîyî rastîya cimatkîye ser o vinderê.”  Yagizî tewr peynî de nê vatî: “Ma do na çalakîya xo biresnê serfirazîye. Ez do bi xebate bikerî ke xeyalanê xo bica bîyarî. Bikerî ke birînanê şarê ma bipêşî. Umîdê min ê serfirazîye xurt o.” HEWLÊR 

Dikarî Biecibînî