‘Xêzê ke dêsan ra ravêrenê’ ameyî pêramotene

Îzmîr de bi hemkarîya ÎHD, Ekîba Ame Dîyene û Kovara Karîkaturî ya Homurî seba ke bale biancîyo probleman û vengê tepişteyan bêro eşnawitene pêramotişê bi nameyê ‘Xêzê ke dêsan ra ravêrenê’ ame akerdene

Seba bale bêro antene serê problemanê tepişteyanê ke zîndanan de yê û vengê înan bêro eşnawitene bi hemkarîya ÎHD, Ekîba Ameyo Dîyene û Kovara Karîkaturî ya Homurî pêramotişê karîkaturan ê bi nameyê ‘Xêzê ke dêsan ra ravêrenê’ ame akerdene. Pêramotişo ke Kulturpark de bi babeta azadîye ame akerdene do heta 16ê Nîsane dewam bikero.

Pêramotiş de mabênê înan de karîkaturîst û resamê tepişteyî yê sey Zehra Dogane, Ahmet Bîlge, Aynur Eplî, Bariş Înan, Melîh Gurer, Cemal Bozkurt û Ozlem Ozdemîre zî tede do xêzkerdişê karîkaturîst û resamanê tepişteyan bêrê pêramotene.

Rixmê şertanê zîndanî de berheman danê

Serekê ÎHDyî yê Şaxê Îzmîrî Zafer Încîno ke akerdiş de qisey kerd, ard ziwan ke amaco bingeyên ê pêramotişî paştdayîşê seba karîkaturîstanê zîndanan o. Încîyî va ‘hunermendê ke zîndanan de manenê zafê reyan seba berhemdayîşî yan malzemeyê înan kemî manenê yan zî îdare malzemeyan rê destûr nêdano’ û wina domna: “Ê şertan de zeylî kesê sey Zehra Dogane yê ke çinbîyayîşî ra malzemeyan afernenê estê. Ganî ma heme ehemîyet bidê berhemdayîşê înan ê şertanê zîndanan û goş bidê vengê înan. Her tewir paştdayîşo ke do hetê ma ra înan rê bêro dayene zaf muhîm o.”

Amac xurtkerdişê paştdayîşî yo

Gamze Yentura ke bi nameyê Ekîba Ame Dîyene qisey kerd va: “Amacê ma yê nê pêramotişî resnayîşê berhemanê tepişteyan bi serfirazîye yo û merdimê ke teber de yê bala înan antişê bi halê tepişteyan o. Tirkîya de nika 260 hezar tepişteyî estê. Amacê nê pêramotişan zêdekerdişê paştdayîşî yo.”

Merdimo ke eşkeno têkilî rono tepişte nêhesibyeno

Mesuldarê Kovara Karîkaturî ya Homurî Canol Kocagozî zî va ‘Ganî ma bi pêramotişanê bi nê qaydeyan paştî bidê înan’ û wina dewam kerd: “Karîkaturîstê ke zîndanan de yê şertanê xo yê zehmetan ravêrenê û bi berhemanê xo ramojnenê ma ke ê çîyanê ke teber de benê, înan ra hayîdar ê. Înan reyna îspat kerd ke merdimê ke bi berhemanê xo têkilî ronanê ganî çi rey sey tepişte nêrê hesibnayene.” ÎZMÎR

Dikarî Biecibînî