KCD şehîdanê Enfalî yad kerd

Kongreya Komela Demokratîke (KCD) şehîdanê komkiştişê Enfalî yê ke 33 serrî verê cû hetê rejîmê Seddem Huseyînî ra amebî kiştene, yad kerd

Kongreya Komela Demokratîke (KCD) bi eşkerayîyêka nuştekîye şehîdê Enfalî yade kerdî. KCDyî eşkerayîye de bale ante serê komkiştişanê ke heta nika Kurdistan de ameyê kerdene û ame vatene ke, ê îşxalker û dîktatorî do hesab bidê. Eşkerayîye wina ya: “Bi se serran o dîktator û îşxalkerî Kurdistan de komkiştişan kenê. Dîktatorê nikayî zî eynî polîtîkayan ê qirkerdişî kenê ra xo ver. Sere Komkiştişê Enfalî yo ke tarîxê merdimîye de sey lekeyêk şermî yo, 33 serrî derbaz bîyî. 14ê Nîsane1986 de komkiştiş bi fermanê dîktator Seddem Huseyînî dest pêkerd, heta serra 1989î bê mabên dewam kerd û 182 hezar merdimê ma ameyî qetilkerdene û goranê pêseran de ameyî wedardayene.  Tehrîbat û zerarê nê sûcî hîna zî dewam keno.

Komkiştişê Enfalî, ne yo destpêk o, ne zî yo peyênê  nê komkiştişan o ke dewletî û îşxalkerî Kurdistan de varê şarê Kurdî kenê. Komkiştişê Qoçgirî, Agirî, Zîlan, Dêrsim, Mereş û xeylî komkiştişê bînî ameyî viraştene û nê polîtîkayê komkiştişî Qamişlo, Roboskî, Şengal, Kobanê, Cizîr, Silopî, Sûr, Nisêbîn, Kerboran, Gever û roja ma de zî Efrîn de bi rijnayîş û talankerdişê bajaran nê komkiştişê yenê dewamkerdene. Dewletê îşxalkerî nê komkiştişanê xo bi paştdayîş û hetkarîya hêzanê emperyalîstan kenê. No semed ra nê hêzê mîyanneteweyî hamparê nê komkiştişan ê.

Ma bi nê vîr û hîsan 33. serrgêra Enfalî de, nê komkiştişî bi şîdet şermezar kenê. Ma bawer kenê ke heme berpirsîyarê herêmî û mîyanneteweyî do hesab bidê û têkoşînê ma yê azadîye û xelisnayîşî bi serkewtişî tacîdar bibo.” AMED

Dikarî Biecibînî