MNG Kargo ra mesajêko ecêbin

MNG Kargo Endamê Meclîsê Şaredarîya Êlihî yê HDPyî Reşat Akinciyî rê mesajê ‘Çîyo ke şima erşawit teslîmê HDP PKKyî bîyo’ erşawit

Endamê Meclîsê Şaredarîya Êlihî yê Partîya Demokratîke ya Şaran (HDP) Reşat Akinciyî weçînayîşê herêmî yê 31ê Adare de ame weçînayîş û Heyetê Weçînayîşî yê Berzî (YSK) bi mehneya Qerarnameyê Hukmê Qanûnî (KHK) ra ameyo îxraçkerdene mazbata nêdîya ci. Akinci seba ke muracatê mehkema bikero, ewraqanê xo bi rayîrê MNG Kargoyî erşawit Merkezê Pêroyî yê HDPyî. Prosesê erşawîyayîşê ewraqan de MNG Kargo 3 reyan mesaj erşawit Akinciyî rê û tewr peynî mesajêko ecêbin ê winasî erşawit ‘Erşawitişê şima 06/05/2019î de hetê şûbeyê ma yê ESATî ra teslîmê HDP PKKyî ameyo kerdene.’

Zîhnîyetê îqtîdar û MNG Kargoyî yew o

Derheqê babete de Reşat Akinciyî înan va: “Wexto ke mi mesaj dî, ez şok bîya. ez rayîr de bîya û şîyêne Anqara. Ez cadenmkargo gêraya. Wexto ke ez resaya merkezê partî, mi Komîsyonê Huqûqî rê qala babete kerd. Ganî şîrketê kargo rê bêro perskerdene ke seba çi mesajêko winasî erşawitî. HDP partîyê hêrin yê Tirkîye yo. Mîlyonan kesan ra rey girewto. Labelê seba ke timî hetê îqtîdarî ra yeno îllegalîzekerdene tay hetî xebetnenî. Ê zî sey îqtîdar fikirîyenî. Zîhnîyetê înan yew o. Karê înan tena kargo û xizmet o. Karê înan o nîyo ke ey fikrê xo yê sîyasî têbigêrî.”

Akinciyî da zanayene ke badê di rojan encax xo resnayo Xizmetê Muşteriyan yê Şûbeyê Esatî yê şîrketa kargo û wina va: “Keso ke mi qisey kerd dîyar kerd ke xebera înan na rewşe ra çin a û mudirê înan babetanê winasî reyde eleqedar beno û dima ra do şima bigêro. Komîsyonê Huqûqî yê HDPyî babete reyne eleqedar beno. Badê tespîtkerdişê berpirsîyaran do prosesê huqûqî bidîyo dest pêkerden.” ANQARA

Dikarî Biecibînî