Amed de Roşanê Ziwanê Kurdkî ame pîrozkerdene

Amed de aktîvîteya ke bi wesîleya Roşanê Ziwanê Kurdkî amî viraştene de, dengbêj û hunermendan sehne de ca girewt, deyîrê Kurdkî vatî, hîkayeyî ameyî qalkerdene û kayê tîyatroyî ame pêşkêşkerdene

Komeleya Cigêrayîşî ya Ziwan û Kulturî ya Mezopotamya (MED-DER), bi wesîleya Roşanê Ziwanê Kurdkî Amed de çalakîyêk viraşte.

Salona Tîyatroyî ya Çand Amedî ya Merkezê Kultur û Kongre yê Şaredarîya Girde de aktîvîteya ziwanî amî organîzekerdene. Akerdişê aktîvîte de îdarekarê MED-DERî Sedat Baranî ard vîrî ke bi wesîleya vejîyayîşê Kovara Hawarî ya 15ê Gulan a serra 1932yî ya ke tede alfabeya Latînkîye amî şuxulnaye, 15ê Gulan a 2006î ra nata na roje sey Roşanê Ziwanê Kurdkî yena pîrozkerdene. Baranî vatişê Celadet Alî Bedirxanî yê ‘Kurdno keyerijîyayeyêno yan mevajê ma Kurd ê yan zî bi Kurdkî biwanê, binûsê û qisey bikerê’ ard vîrî.

Dengbêjî û hîkayeyê kurdkî

Dima ra dengbêjan ra Xemlîxan û Reşoyî sehne de deyîrê xo vatî. Herekîyayîşê programî de hetê qalkerdoxanê hîkayeyan ra hîkayeyê Kurdkî ameyî qalkerdene. Dima ra zî hunermend Rênas Pîroyî sehne de ca girewt. Pîroyî bale ant  grevanê vêşanîye yê ke hemverê tecrîdê Îmraliyî de zîndanan de dewam kenê ser û va ke ganî kes bêveng memano.

Kayê tîyatroyî

Tewr peynî de kayê Tartûffe yê Tîyatroyê Bajarî yê Amedî yo ke binê nameyê dînî de sextekarîyan qal keno ame pêşkêşkerdene. Kay hetê temaşekaran ra bi ecêbnayîşî ame temaşekerdene. Dimayê kayî ra kaybaz Ozcan Ateşî muhîmîya ziwanê maye ser o qisey kerd û waşt ke her kes ziwanê xo rê wayîr vejîyo. AMED

Dikarî Biecibînî