Dayîkê hepsîyan: Êdî bes o goş bidenê vengê ma

Dayîkanê tepişteyan meclis de HDPyî ya pîya kombîyayîşêk viraşt. Kombîyayîşê çapemenîye de bale ancîya sere rewşa xoverdayoxan û ame waştene ke tecrîd cade bêro wedartene

Hemsereka Partîya Demokratîke ya Şaran (HDP) Pervîn Bûldane û dayîkê tepişteyanê ke semede baleantişê serê greve vêşanîye û rojeyê mergî vizêr ra meclîsde çalakîya ronişî virazenê pîya kombîyayîşê çapemenîye viraşt.

Roja gameeştişî ewro ya, beno ke siba zaf erey bo

Pervîn Bûldane vist vîr ke vizêr ra xeylî dayîkê aşitîye bajaranê cîya cîya ê Kurdistanî ra ameyî meclis de dest bi çalakîya roniştişî kerd û va: “Dayîkî verê zîndanan de qîrênê û wazenê vengê xo bidê eşnawitene la hukmat herinda goşdarîkerdişê dayîkan de înan rê hêriş keno û bi erdî ra kaşkerdişî destbend keno. Ma heme zanê ke rewşa grevgeran kewta merheleya krîtîke. Nika zî kewtê rojeyê mergî. Waştişê înan meşrû û  huqûqî yê. Wazenê ke tecrîdê sere Rayberê Şarê Kurdî Abdulah Ocalanî bêro wedartene. Pêvînayîşê 2ê Gulane gameka biqiymet a û ganî na game dewam bikero. Dayîkê semede weşîya domananê xo verê zîndanan de qîrênê. Eke çîyêko xirab bibo no welat zî keweno tenagayîya girde. Ganî tecrîd cade bêro wedartene. Ewro ra tepîya beno ke tehluke gird bo. Roja gameeştiş ewro yo. Beno ke siba zaf erey bo. Ma hinî rojî caverdayî saetan marênê. Ganî cade de goş bidîyo dayîkan û waştişê xoverdayoxan bêrê ca. Tecrîd wa cade bêro wedatene.”

Dayîkan ra vanê cennet la ma erdî ra kaş kenê

Bi nameyê dayîkan zî Nezahat Teke nê vatî: “Ma tena ewro nê bi aşman o vernîya zîndanan de xover danê.  Ma vizêr ameyî tîya,ma va eke çareyêk esto, tîya ra vejîyeno. Serekê meclîsî ma dir pêvînayîş viraşt la no nêvejeno. Ma dîyîkê hinî  yewe rewşe de ke eke telefon bicino ma vanê xebera mergî ya, eke çimê yewe dayîkê hesrin bi ma vanê xebera mergî ya. 2 mengî yo ma Wezîrîya Edaletî ra randevû wazenê. Qalê de tim estî vanê, ‘Cennet binê linganê dayîkan de yo’ la ma muhatap nêgênê. Wayîrê na dewa ma yê. Nê ewladê ma yê. Ma senî eşkenê merdişê înan rê bêveng bimanê. Çi heyfo ke ewro Tirkîya de dayîkê ke înan ra vanê cennet erdî ra yenê kaşkerdene. Ez domanê xo ra yew lemê kijîkê xo nêerzena teber. La ewro laçigê ma binê lingan de yê. No eybê dinya û merdimîye yo. Ma veng danê merdimîye, edaletî, ma veng danê her kesî. Ma menga Remezanî de yê nê dayîkî bi rojeyî rojeyê xo akenê. Hema ke ma domanê xo binê erdî nêkerdî ma nê kînî bine erd bikêrê. Ma veng dane serokkomarî Wezîrîya Edaletî. Vengê ma bieşnawenê. Hinî bes o, adirê zerrîya ma bieşnawenê. Wa ewladê ma memirê.” ANQARA

Dikarî Biecibînî