Bahadiro ke grevê vêşanîye de yo: Roje roja roniştişî nîya

Ahmetcan Bahadiro ke Zîndanê Tarsûsî de 80 rojî yo grevê vêşanîye de yo, ard ziwan ke nêweşîya tepişteyanê ke grevê vêşanîye de yê giran bîya û înan ra tayê gonî virijîyenê

Xoverdayîşê grevê vêşanîye û rojeyê mergî yê ke serkêşîya Hemsereka KCDyî Leyla Guvene dest pêkerdî, hepisxaneyan de dewam kenê. Bi hezaran tepişteyê PKK û PAJKî vera tecrîdkerdişê Rayberê PKKyî Abdullah Ocalanî grevê vêşanîye de yê. 30 tepişteyî zî vera tecrîdî rojeyê mergî de yê. Çalakgeranê grevê vêşanîye ra yew zî Ahmetcan Bahadir o. Bahadiro ke Zîndanê Tîpa T-3yî yê Tarsûsî de yo 1ê Adare nata grevê vêşanîye de yo.

Bahadir, bi rayîrê keyeyê xo zanayîşî dayî û wina va: “Moral û hêzê tepişteyan baş o, labelê weşîya înan xirabêr bena. Mi 19 hevalanê xo reyde 1ê Adare de dest bi grevî kerd. Tayê hevalê mi gonî viritene. Çalakîya dayîkan zaf pîroz a. Weşîya Ercanî û Mahmût xeylî xirab a. Weşîya înan her ke şina xirabêr bena. Bêhal ê û gêj benê. Ma vengdayîş bi heme kesanê muxalîf û demokrasî pawitoxan kenê ke dorê dayîkan de bibê yew û hêz bidê dayîkan. Tîya çîyo ke ma kişeno bêvengî ya. Ganî her kes goş bido wijdanê xo ser. Ganî heme kesê ke wayîrê wijdanî yê, vengê xo berz bikerê.”

Merg zî bibo ma dest dewaya xo ra nêverdenê

Bahadirî, mudaxaleyê vera dayîkan zî şermezar kerd û wina va: “Ganî hevalê ma yê ciwanî werizê payan ser. Ganî ciwanî dayîkan ra wayîr vejîyê. Dayikê Leçegsipî rastê zulm polîsan yenê. Roje roja roniştişî nîya. Ganî her kes tewrê çalakîye bibo û hêz bido dayîkan. Roje roja xoverdayîşî ya. Heta ke tecrîdê serê Rayberê ma nêro wedaritene têkoşînê ma do dewam bikero. Merg zî bibo ma do dest dewaya xo ra vera nêdê.” EDENE

Dikarî Biecibînî