Bi nanê tewqe debara xo kenî

Gulendem Sari û Fatma Sevîme no hewayo germin yê hamnanî de tewqe ser de nan pewjenî û bi pewtişê nanê tewqe debara xo kenî.  Cinîyan dîyar kerdî ke krîzê ekonomî vera karê înan zî sey verê cû nîyo

Taxa Cîhanbeylî ya Konya de nano ke tewr zêde yeno werdene ra yew zî nanê tewqe yo. Gulendem Sari (60) û Fatma Sevîme (55) no hewayo germin yê hamnanî de nanê tewqe pewjenî. Cinîyê kedkar bi qarton û kolîyê cîranan tewqa xo germ kenî û nanê xo pewjenî.

Fatma Sevîma ke 3 serrî verê dikanêko nanê tewqe de xebetîyayêne dîyar kerde ke nika dikanê xo de xebetîyena û va: “Her çiqas ke zehmetî bibo zî ez karê xo ra hes kena. Ez tewrê 3 cinîyan hemwelatijanê Cîhanbeyliyî rê nanê  tewqe virazena. Ma tena nanê tewqe nêvirazenî. Ma rişte û kiloran zî virazenî. Çîyê ke ma virazenî hem tîya de yenî rotene û hem zî dikananê cîya-cîyayan rê yenî rotene. Rewşa karê ma nika baş nîya. Roje de 10-20 paket vejîyenî ya nê. Yew paket de 8 nanî estî.”

Gulendam Sariye daye zanayene ke aye 18 serrî yo ke no karî kena û wina dewam kerde: “Emrê mi 60  serrî yo û no germê hamnanî pewtişê nanî zor û zehmetin o. Ma keye de 6 nufis î. Doman nêwanenî û seba ke kar çin o betal î. Ez xebetîyena û debara keyeyê xo kena. Ma roje de 11 saet xebetîyenî. Ma krîzê ekonomî vera nêeşkenî derbazê dikanêko gird bibî. Cayê ma zaf şenik o. Krîzê ekonomî vera kar nêkeweno destê kesêk.” KONYA

Dikarî Biecibînî