Cenazeyê Çelîk û Karakuşe Amed de ameyî definkerdene

Cenazeyê gerîlayanê YJA Starî Menfiya Çelîk (Dîcle Amed) û Habîbe Karakuşe (Kînem Amed) ke Dêrsim de netîceyê pêrodayîşî de cuya xo vindî kerdbî, Goristanê Yenîkoyî yê Amedî de hetê merdimanê xo ra ameyî definkerdene

Goreyê îdîayanê çapemenîya tirkî pêrodayîşo ke Dêrsim de vejîyabî de 5 gerîlayê YJA Starî cuya xo vindî kerdî. Goreyê îdîayan nameyê gerîlayanê ke cuya xo vindî kerdî wina yî; Menfiya Çelîk (Dîcle Amed), Fatma Ozgun (Nûda Herekol), Mîhrîban Durmaz (Berfîn Ararat), Ceyda Sarikaya (Havîn Mûş) û Habîbe Karakuşe (Kînem Amed).

Badê ke cenaze erşawîyayî Meletî, keyeyê gerîlayan seba herînayîşê cenazeyan şîyî Meletî. Muracatê keyeyan ra dima cenazeyê Menfiya Çelîk û Habîbe Karakuşe teslîm ameyî girewtene û ardî Amed. Cenazeyê Çelîk û Karakuşe vizêr saetanê şewe de Goristanê Yenîkoyî yê Amedî de bi tewrbîyayîşê keyeyan ameyî definkerdene.

Merasîmê definkerdişê cenazeyan ra ver polîsî dormeyê Goristanê Yenîkoyî girewtî binê ablûqa û destûr nêdayî ke kesêk tewrê merasîmê cenaze bibo. Sewbîna polîsan her keyeyêk ra tena destûr dayî 5-6 kesan ke tewrê merasîmê definkerdişê cenazeyan bibî.

Seba Menfiya Çelîke Sîlvanlilar Yasevî û seba Habîbe Karakuşe zî Seyrantepe Dortyuzevler Yasevî de serweşî yenî qebûlkerdene. AMED

Dikarî Biecibînî