Hemwelatîyo ke qala weçînayîşî kerd raştê hêrişo kardin ame

Weçînitoxê kurd Reîs Bozî badê ke kanalêko Youtube de derheqê weçînayîşê Stenbolî de vînayîşanê xo ard ziwan ser, serê dêsê keyeyê ci de nameyê ci ame nuştene û kard bi nameyê ci ser de ame ronayene. Bozî va: “Seba ke mi va heq, huqûq û edalet mi tehdit kenî. Tehdito ke yeno kerdene keyeyê mi tersneno.”

Weçînitoxê kurd Reîs Bozî badê kanalêko Youtube yê bi nameyê ‘Tîmes Stenbolê’ de derheqê weçînayîşê Stenbolî de vînayîşanê xo ard ziwan ser. Badê ke Bozî vînayîşanê xo ard ziwan ser kesê ke nameyê înan nîno zanayene vizêr şewe dêsê keye ser de nameyê ci nuştî û dima ra kard ronayî nameyê Bozî ser.

Reîs Bozî Tahtakale ya Avcilarî de cuyeno û badê roportajê raşteyî, raştê tehdîtê bi kardin ame. Bozî Ajansê Mezopotamya (MA) rê qala hedîse kerd.

No raybaz maneno raybazanê çeteyanê DAIŞî

Bozî qiseykerdişê xo de wina va: “Rewşa ewro ya Tirkîye zaf tehluke ya. serê bîyayîşê nijadperestî yê merdiman de nakokîyê girdî estî. Mi roportajê xo de çîyo ke lazimî bêrî vatene vat. Badê ke roportaj medyaya komelkî de bî rojev, ez raştê tehditan ameya. Heta ke ez resaya keye, mi vîna ke dêsê keyeyê mi ser de nameyê mi nuşteyo û kard çekilîyayo nameyê mi ser. No raybaz maneno raybazanê çeteyanê DAIŞî ke Sûrîye de wexşîtî pê ardî. Ma înan caardişanê serranê 1990an, Torosanê Sipîyan, Faîlanê kerdoxanê nedîyar û veşênayîşê dewan ra baş zanî. Ma aye wext zî sere nêrona û ma do ewro zî sere nêronî. Ma do vera no zilmo ke yeno cuyayene de vengê xo berz bikerî.”

Ez do qetî goş nêda nê tehditan

Bozî dewamê qiseykerdişê xo da zanayene ke îqtîdar timî bawerî keno halet û va: “Ez Erzirom ra ya. Qayûm tayînê Erzirom û xeylê şaredarîyanê herêmî kerdî. Bi serran o no welat de qala îslamîyetî yeno kerdene. Mi medrese wendo. Gelo no heq, huqûq û edalet o. Seba ke mi înan va, ez ameya tehditkerdene. La ez do qetî goş nêda nê tehditan. Ez do heta peynî fikir û vatişanê xo bîyara ziwan.”

Tehdito ke ame kerdene raştîya Tirkîye rafîneno çiman ver

Bozî tewr peynî qala hêrişê kardin kerd û va: “No eyb eybê Tirkîye yo. Tehdito ke mi rê ameyo kerdene raştîya Tirkîye rafîneno çiman ver. Keso ke fikrê xo ano ziwan ser û qisey keno raştê hêrişan yeno. Êdî ez zî nêzana se vaja. Badê tehditî tena endamê HDPyî û CHPyî mi gêrayî. Ez do seba vînayîşê kerdoxan muracatê selahîyetdaran bikera.” STENBOL

Dikarî Biecibînî