Hepsîyê Zîndanê Xarpêtî yenî îşkencekerdene

Hepsîyê Zîndanê Xarpêtî bi rayîrê keyeyê xo dayî zanayene ke no hewteyêk o îşkence bi înan yeno kerdene. Hepsîyan dîyar kerdî ke gardîyanan pêroyê roje de mîyanê heme qawişan gêrenî, înan derp kenî û kesê ke vera înan de bivejîyî kenî hucreyanê yewkesî

Komeleya Cezaya Înfazî ya Xarpêtî ya Tirkîye 4. zîndanê tewr girdî yo. Bakurê Kurdistanî de zî zîndanê tewr girdî yo. Zîndanê Xarpêtî taybetê serra 2017î ra nata bi binpaykerdişan keweno rojeve. Goreyê malumatan Zîndanê Hûmara 1. û Hûmara 2. yê Asayîşo Berzî yê Xarpêtî de no hewte îşkence bi hepsîyan yeno kerdene û kesê ke vera înan de vejîyenî erzîyenî hucreyanê yewkesî

Derheqê babete de merdimê hepsîyan yê ke înan reyde pêvînayîş ame kerdene malumatan dayî. Înan ra yew zî Rojda Amaça ke roja yewşeme mêrdeyê xo Sînan Amaçî reyde pêvînayîş viraşte ya. Amaçe qiseykerdişê xo de wina va: “Mêrdeyê mi pêvînayîş de mi rê va; ‘No hewteyêk o zextê serê ma dest pêkerdî. Gardîyanî şew û roje qawişan gêreyî û têmîyan kenî. Hepsîyan kutenî û kincê înan dirnenî. Hepsîyê ke vera înan de vejîyenî yenî îşkencekerdene û erzîyenî hucreyanê yewkesî.’”

Amaçe qiseykerdişê xo yê peyênan de daye zanayene ke ê seba nê binpaykerdişan mudirîya zîndanî rê waştişname erşawitî û wina qedênaye: “Labelê ê goşnêdayî ma. hayîya kesêk nê çîyan ra çin o. Timî zext û îşkence bi hepsîyanê sîyasîyan yeno kerdene. Ganî sere de wezîrîya edaletî û rêxistinê komelkî yê sivîlî, ganî goş bidî qêrayîşê hepsîyan û bikewî mîyanê têgêrayîşan.”

Nê malumatan ra dima rojnamegerê Ajansê Mezopotamya (MA) Zîndanê Xarpêtî gêrayî. Labelê selahîyetdarê zîndanî derheqê babete de tu malumatêk nêdayî. XARPÊT

Dikarî Biecibînî