Komîteya Amadekar: Bêrêne ma pîya vera şerî de biqîrî

Endamê Komîteya Amadekar yê mîtîngê HDPyî yê Amedî ke do 22ê temmuze de pê bêro vengê tewrbîyayîşê mîtîngî kerdî: “Seba ke şer peynî bibo ganî ma pîya biqîrî.”

Partîya Demokratîke ya Şaran (HDP) 22ê temmuze de bajarê Amedî de bi siloganê ‘Seba aştîyêka birumet çareserîya demokratîke’ Raşteyê Îstasyonî yê Amedî de mîtîngêk virazena. Bajaranê dormeyan ra do hemwelatîyî tewrê mîtîngî bibî. HDP no hewte xebatan keno û şar dawetê mîtîngî keno. Taybetî Amed de rayîrber û parlamenterê HDPyî kuçe bi kuçe gêrenî û vilawekanê vengê tewrbîyayîşê mîtîngî kenî hemwelatîyan rê.

Mîtîng do saet 17.00î de roja dişeme Raşteyê Îstasyonî de pê bêro. Hemsereka Kongreya Komela Demokratîke (KCD) Leyla Guven, Hemverfekê Kongreya Demokratîke ya Şaran (HDK) Gulîstan Kiliç Koçyigît, Hemserekê Pêroyî yê HDPyî Sezaî Temellî, Hemserekê Pêroyî yê Partîya Herêmê Demokratîkî (DBP) Mehmet Arslan, Hemserekê Pêroyî yê Konfederasyonê Sendîkaya Kedkaranê Rayapêroyî (KESK) Mehmet Bozgeyîk, aktîvîstê Tevgerê Cinîyanê Azadan (TJA), Hemserekê Pêroyî yê Partîya Sosyalîstanê Bindeste (ESP) Şahîn Tumuklu û Serekê Pêroyî yê KKPyî Sînan Çîftyurekî do xîtabê şarî bikerî. Koma Çarnewa û Koma Azad zî do mîtîngî de deryan bivajî û konser bidî.

Endama Komîteya Amadekar Arzu Kizilkaya dîyar kerde ke 40 serrî yo welat mîyanê şerî de yo û ganî hemverê şerî de ma vengê xo biqîrî. Endamê Komîteyî Muhhamed Erkîzî zî da zanayene ke hemvere polîtîkayanê şerî de lazim a ma pîya biqîrî û ganî her kes 22ê temmuze de bêro Raşteyê Îstasyonî. AMED

Dikarî Biecibînî