Îdîayê îşkence: Yoldaş wedarîya nêweşxane

Ame dîyarkerdene ke Ahmet Yoldaşo ke vizêr sereştişê keyeyî de ameybî tepiştene, Mudirîya Polîsan ya Amedî de raştê îşkenceyo giran ameyo û cok ra wedarîyayo nêweşxane

Hêzê girêdayeyê Mudirîya Asayîşî ya Amedî vizêr saetanê serê sibayî de eştbî keyeyê Ahmet û Bîrsen Yoldaşe yê Cadeya Karacadagî ya qezaya Rezan ya Amedî ser. Sereştişê keyeyî de hemwelatijo bi nameyê Mucahît Yilmazî ke qezaya Qoser ya Mêrdînî ra yo cuya xo vindî kerdbî û wayîrê keyeyî Ahmet û Bîrsen Yoldaşe zî ameybî tepiştene.

Cenazeya Mucahît Yilmazî ke cuya xo vindî kerdbî Morgê Nêweşxaneyê Perwerdeyî û Cigêrayîşî yê Amedî de yena tepiştene. Ame dîyarkerdene ke keyeyê Yilmazî ameyo Amed û dayo zanayeno ke malumatê ke derheqê kamîya lajê înan de ameyî dayene raşt î, la seba ke cenaze nêvînayî nêzanê keso ke ameyo kiştene lajê înan o ya nê. Ame vatene ke ferdê keyeyê Yilmazî seba teşhîskerdişê cenaze muracatê Serdozgerîya Komarî ya Amedî dayî.

Eynî wext de ame dîyarkerdene ke Ahmet Yoldaşo ke vizêr sereştişê keyeyî de ameybî tepiştene, Mudirîya Polîsan ya Amedî de raştê îşkenceyo giran ameyo û cok ra wedarîyayo nêweşxane. Ame zanayene ke Yoldaşî îşkenceyo giran vera wedarîyayo Nêweşxaneyê Leşkerî yê Amedî û tedawîya ci dewam keno. Cinîya Yoldaşî, Bîrsen Yoldaşe zî nika Şûbeyê TEMî yê Amedî de yena tepiştene. AMED

Dikarî Biecibînî