aram

‘Do çimeyê awa pake, cuya xozayîye û xozaya Dêrsimî vînî bibê’

Hemverê îlankerdişê 43 hezar û 350 hektarî sey wareyê madenî ke qismêkê Parka Milîyî ya Mûnzûrî zî tede yo reaksîyonî dewam kenê

Parka Milî ya Mûnzûrî ke tede çimeyê awa pake, tewirê nebatan ê endemîkî û cuya xozayîye esta qismêkê ci keweno mîyanê 43 hezar û 350 hektarî ke sey wareyê madenî ameyo îlankerdene. Dewê Cevîzlîdere, Karayonca, Karaoglan û Doludîbekî yê ke pabesteyê Pulurî yê û nizdê Çimeyanê Mûnzûrî yê û dewa Geyîksûyû û gomê Sînî yê ke pabesteyê Dêrsimî yê seba cigêrayîşê zerrn, paxir û sîmî0 sey wareyê cigêrayîşê madenan ameyî îlankerdene, ruhsatê nê sehayan dîya şîrketêkê taybetî.

‘Mumkun nêyo ke merdimî biciwîyê’

Vervatoxa Meclîsê Cinîyan ê Partîya Demokratîke ya Şaran (HDP) ya Dêrsimî Nurşat Yeşîle bale ante serê projeyanê madenî yê şaristanî û vat ke eke projeyî bêrê bicaardene do çimeyê awa pake, cuya xozayîye û xozaya Dêrsimî vînî bibê. Yeşîle ard ziwan ke cayê ke cigêrayîşê madenî yenê kerdene ê cayan de cuye nêmanena û vat ganî Dêrsimijî hemverê projeyanê ke yeno waştene bêrê bicaardene de vengê xo berz bikerê. Yeşîle cigêrayîşê madenî yê Koyanê Kazî ardî vîrî û vat tehrîbato ke Koyanê Kazî de ameyî kerdene, heman tehrîbatî yeno waştene ke Dêrsim de zî bêrê kerdene. Yeşîle vat netîceyê mucadeleyê hemparî yo ke înan sazî û organîzasyonanê şaristanî dir pîya dayo de verî projeyê barajan ameyê betalkerdene û vat ê do heman mucadeleyî hemverê projeyanê madenan de zî bidê.

Yeşîle veng da Dêrsimijanê ke teberê bajarî de yê yan zî teberê welatî de yê û va: “Eke şima wazenê gama ke hamnanî bêrê tîya nê xasekîyan reyna bivînê, ganî ma heme hemverê nê projeyan de mucadele bidê. Cayo ke xoza qedîyaya ûca ciwîyayîşê merdiman mumkun nêyo. Eke ma mucadeleyê hemparî bide ma do bi ser bikewê û xozaya xo biresnê ameyoxî.” DÊRSIM