aram

Koordînasyonê Hesenkeyfî: Awbendê Ilisûyî bi mîlyonan ganeyan ser o gefêko pîl o

Koordînasyonê Hesenkeyfî ewro eşkerayîyêka nuştekîye weşanaye û va: “Awbendê Ilisûyî bi mîlyonan ganeyan û Hesenkeyfî ser o gefêko pîl o.”

Koordînasyonê Hesenkeyfî ewro eşkerayîyêka nuştekîye weşanaye. Eşkerayîye de nê çîyî ameyî vatene: “Awbendê Ilisûyî û projeyê HESî do qasê 400 kîlometreyî tesîrê bi mîlyonan ganeyan bikero. Pîya bi ê Hesenkeyfo ke 12 hezarî serre tarîxê ê esto û 300 wareyê arkeolojîkî yê ke tede yê do binê awe de bimano. 20-22ê temmuze de bê ke çîyêk bêro vatene fekê awbendî ameyî girewtene û awe awbendî de yena pêser. Dîmenanê peyke yê 19, 24 û 29ê temmuze ra bewlî beno ke fekê awbendî seba cerebnayîşî nê la bi hawayêkê mendeyî ameyê girewtene. Awa gola awbendî roje bi roje bena zêde û merdimê ûcayî nêzanê do awe key bireso serê ware û erdanê înan. Bi gola awebendî vejîyayo werte ke Tirkîya peymannameyê Neteweyê Yewbîyayeyî binpay kerdê. Mîyanê çend mengan de Hesenkeyf û 300 qilî do binê awe de bimanê. Ganî Awbendê Ilisûyî û projeyê HESî bêro vindarnayene û fekê awbendî bêrê akerdene û awe bêro vengkerdene. Ma veng danê heme entellektuelan, roşinvîran, partîyanê sîyasîyan û organîzasyonanê cinî û ciwanan ke bêrê ma pîya seba Hesenkeyfî û Newala Dîcle mucadele bikerê.” STENBOL