aram

60 serrî yo westayîya kuzan keno

Dêrsim de westayê tekane û yê ewilî ke kuzan virazeno fek hunerê xo ra vera nêdano. Bozkurtî da zanayene ke bê viraştişê kuzan hewîya ci nîno

Halîl Bozkurt (73) Bajarokê Perî yê qezaya Mazgêrî ya Dêrsimî de domanîya xo ra nata çamir ra kuz û kelupelanê rindikan virazeno. Bozkurtî bi karê xo wazeno kulturê tarîxkî payan ser de vindarno. Bozkurtî dîyar kerd ke o Dêrsim de westayê ewilî yê kuzan û westayêko ermenî ra karê musayo. Bozkurt da zanayene ke o welê kelupelan qeraxê Çemê Mûnzûrî ra ano û her çiqas ke extîyar bibo zî roja de 15 kuzan û nizdîyê 100 heb kelupelanê rindikan virazeno.

Bozkurtî qiseykerdişê xo de wina va: “Seba ke ez karê xo de aver şêra û serkewte biba mi welatanê sey DYA, Fransa, Îngîlistanî zî tede û 12 welatan gêraya û berardişanê xo roşena Tirkîye û xeylê welatanê dinya. 60 serrî yo ez no gure kena. Seba ke karê mi çin nêbo çi destê mi ra bêro ez kena. Karê mi aîdê ermenîyan o.” DÊRSIM